मुंबई- राष्ट्रवादी काँग्रेसचे ज्येष्ठ नेते प्रफुल्ल पटेल यांची काल मुंबईच्या ईडी कार्यालयात चौकशीकरण्यात आली . सीजे हाऊसप्रकरणी त्यांची चौकशी झाली. यापूर्वी ईडीने २०१९ मध्ये पटेल यांची १२ तास चौकशी केली होती. याच प्रकरणात ईडी पुन्हा चौकशी करत आहे. २०१९ मध्ये दाऊद इब्राहिमचा सहकारी इक्बाल मिर्चीच्या पत्नीसोबत आर्थिक व्यवहारप्रकरणी ईडीने पटेल यांना समन्स बजावले होते.
पटेल कुटुंबाची मालकी असलेल्या मिलेनियम डेव्हलपर्स प्रायव्हेट लिमिटेड कंपनीकडून इक्बाल मेमन याला भूखंड देण्यात आला होता. तो वरळीतील नेहरू तारांगणसमोर आहे. याच ठिकाणी मिलेनियम डेव्हलपर्सने १५ मजली इमारत उभी केली आहे. त्याचे नाव सीजे हाऊस आहे. ईडीने सीजे हाऊस इमारतीचा तिसरा आणि चौथ मजला जप्त केला आहे. ही इक्बाल मिर्चीची मालमत्ता असल्याचे सांगितले जाते.
नेमके प्रकरण काय आहे?
प्रफुल्ल पटेल यांच्यावर कुख्यात गुंड दाऊद इब्राहिमचा सहकारी इक्बाल मिर्चीसोबत आर्थिक आणि जमीन व्यवहार केला असल्याचा आरोप आहे. पटेल यांच्या कुटुंबाच्या मिलेनियम डेव्हलपर्स प्रायव्हेट लिमिटेड कंपनीकडून इक्बाल मेमनसोबत आर्थिक व्यवहार करण्यात आला असल्याचे आरोपामध्ये सांगण्यात आले आहे. ईडीकडून सध्या याचा तपास करण्यात केला जात आहे. सीजे हाऊस ही वरळीमधील हायप्रोफाईल सोसायटी आहे. जी पटेल यांच्या मिलेनियम डेव्हलपर्सने विकसित केली असल्याची माहिती ईडीला मिळाली आहे.
