.आता मुलांनाही सायकली द्या …. पवारांची सूचना

पुणे-‘आतापर्यंत शंभर टक्के म्हणजे 25 हजार शालेय मुलींना सायकली वाटप करण्यात आल्या. हा उपक्रम महत्त्वाचा आहे. मात्र, माझी एक सूचना आहे, वर्षापासून मुलींसोबत आता गरीब मुलांनाही सायकल द्यावी,’ अशी सूचना राष्ट्रवादी काँग्रेसचे अध्यक्ष शरद पवार यांनी संयोजकांना केली.
टाटा ट्रस्ट, पवार पब्लिक चॅरिटेबल ट्रस्ट तसेच मेंटर्स फाउंडेशनच्या संयुक्त विद्यमाने बारामती, इंदापूर, दौंड, पुरंदर, भोर, वेल्हा, मुळशी, हवेली आणि खडकवासला मतदार संघातील शालेय विद्यार्थिनी आणि आशा वर्कर्स यांना शरद पवार यांच्या हस्ते मोफत सायकल वाटप करण्यात आले. या वेळी पवार बोलत होते. व्यासपीठावर पवार पब्लिक चॅरिटेबल ट्रस्टच्या व्यवस्थापकीय विश्वस्त खासदार सुप्रिया सुळे, टाटा ट्रस्टचे भूर्जीस तारापूरवाला, नीरज चंद्रा, आशिष देशपांडे, संयोजक नगरसेवक प्रकाश कदम,सुभाष जगताप ,जिल्हा परिषदेचे अध्यक्ष विश्वास देवकाते, ‘राष्ट्रवादी’चे शहराध्यक्ष चेतन तुपे, जिल्हाध्यक्ष प्रदीप गारटकर , नगरसेवक विशाल तांबे आदी उपस्थित होते. या वेळी सहा हजार सायकलींचे वाटप करण्यात आले.

‘एका वर्षापूर्वी हजारो सायकलींचे वाटप केले. त्याचा आम्ही अभ्यास केला. सायकल मिळाल्याने मुलींची शाळेतील उपस्थिती वाढली. शिक्षणाची गुणवत्ताही वाढली. नापासाचे प्रमाण घटले. हा सुप्रिया सुळे यांचा उपक्रम महत्त्वाचा वाटतो. परंतु, आतापर्यंत मुलींनाच सायकली देण्यात आल्या. आपण एका मुलीचे बाप आहोत. त्यामुळे मुलींना सायकल दिल्याचे समाधान आहे. पण मुलांना सायकल द्यायची नाही या धोरणात आता बदल केला पाहिजे. पुढील वर्षापासून गरीब मुलांना देखील सायकल दिल्या पाहिजे. त्यामुळे मुले-मुली शाळेत जातील,’ अशी सूचना शरद पवार यांनी केली. या वेळी ‘खूप शिका. मोठे व्हा. यशस्वी व्हा,’ असा मोलाचा सल्लाही पवार मुलींना द्यायला विसरले नाहीत. नगरसेवक प्रकाश कदम यांनी प्रास्ताविक केले.