मुंबई-अंधश्रद्धा निर्मूलन समितीचे अध्यक्ष डॉ. नरेंद्र दाभोळकर यांच्या हत्या प्रकरणात सीबीआयने शनिवारी मुंबईतून दोघांना अटक केली. अॅड.संजीव पुनाळेकर आणि विक्रम भावे अशी आरोपींची नावे आहेत. संजीव पुनाळेकर यांच्यावर दाभोळकर हत्याप्रकरणी पुरावे नष्ट करणे, आरोपींना मार्गदर्शन करण्याचे आरोप आहेत तर विक्रम भावेवर आरोपींना दाभोलकरांची ओळख करुन देणे, प्रत्यक्ष घटनास्थळाची रेकी करणे हे आरोप ठेवण्यात आले आहेत.दरम्यान हिंदु विधीज्ञ परिषदचे राष्ट्रीय सरचिटणीस असलेले संजीव पुनाळेकर आणि आरटीआय कार्यकर्ते विक्रम भावे या दोघांच्या अटकेचा सनातन संस्थेने निषेध केला आहे.
संजीव पुनाळेकर मुंबई उच्च न्यायालयात वकील असून हत्याकांडातील आरोपींचेही ते वकील आहेत. पत्रकार गौरी लंकेश हत्या प्रकरणात आरोपींच्या जबानीतून पुनाळेकरचे नाव समोर आले होते. विक्रम भावे गडकरी रंगायतन स्फोटातील आरोपी आहे.
अंधश्रद्धा आणि बुवाबाजी यासारख्या अनिष्ट रुढी परंपरांविरुद्ध लढणारे ज्येष्ठ कार्यकर्ते डॉ. नरेंद्र दाभोलकर यांची २० ऑगस्ट २०१३ रोजी पुण्यातील ओकांरेश्वर मंदिराजवळील महर्षी शिंदे पुलावर गोळ्या घालून हत्या करण्यात आली होती. राज्य पोलीस आणि सीबीआयचे पथक या प्रकरणातील आरोपींचा शोध घेत होते.
पाच वर्ष या प्रकरणाच्या तपासात प्रगती होत नव्हती. मागच्यावर्षी केंद्रीय गुन्हे अन्वेक्षण विभाग सीबीआयने सचिन प्रकाशराव अंधुरे याला अटक केली होती. नालासोपारा स्फोटक प्रकरणात अटकेत असलेल्या शरद कळसकरच्या चौकशीतून सचिन अंधुरेचे नाव समोर आले. सचिन आणि शरद दोघे मित्र आहेत. एटीएसने औरंगाबादमधून सचिनला ताब्यात घेतले. त्याचा गुन्ह्यातील सहभाग समोर आल्यानंतर त्याला अटक करुन सीबीआयकडे सोपवण्यात आले.
पुरोगामींसमोर सीबीआय झुकलं – सनातन संस्था
हिंदु विधीज्ञ परिषदचे राष्ट्रीय सरचिटणीस संजीव पुनाळेकर आणि आरटीआय कार्यकर्ते विक्रम भावे या दोघांच्या अटकेचा सनातन संस्थेने निषेध केला आहे. हिंदुत्ववादी सरकार सत्तेवर असताना संजीव पुनाळकेर आणि विक्रम भावे या दोघांना अटक होण्यामागे कारस्थान आहे. दोघेही निर्दोष असून त्यांचे निर्दोषत्व कोर्टात सिद्ध होईल असे सनातनचे प्रवक्ते चेतन राजहंस यांनीसांगितले.पुरोगाम्यांच्या मागणीसमोर सीबीआय झुकले असा आरोप सनातनने केला आहे. मालेगाव बॉम्बस्फोटामागचा खोटेपणा, असत्य संजीव पुनाळेकरांनी सिद्ध केले होते. त्यांना अटक होणे ही गंभीर बाब आहे.
कुठल्याही अपेक्षेशिवाय संजीव पुनाळेकर समाज, देश आणि धर्माची सेवा करतात. ते निर्दोष आहेत असे सनातनने म्हटले आहे. संजीव पुनाळकेर यांनी दाभोलकर हत्या प्रकरणातील आरोपींचे वकिलपत्र घेतले होते. संजीव पुनाळेकर यांच्यावर दाभोळकर हत्याप्रकरणी पुरावे नष्ट करणे, आरोपींना मार्गदर्शन करण्याचे आरोप आहेत. शरद कळसकरच्या जबाबानंतर दोघांना अटक करण्यात आली. दोघांनाही उद्या सुट्टीकालीन कोर्टात हजर करण्यात येणार आहे.
