मुंबई (प्रतिनिधी):- निवडणुकांचा रणसंग्राम जसजसा जवळ येऊ लागलाय तसतसे शिवसेना भाजपमधील वातावरण तापू लागले आहे, त्यातच भाजपने रविवारी राष्ट्रीय स्तरावरच्या वाहतूक संघटनेची घोषणा करत शिवसेनेला आणखी एक धक्का दिला आहे. माटुंग्याच्या षण्मुखानंद सभागृहात एका भव्य सोहळ्यात केंद्रीय भूपृष्ठ वाहतूक मंत्री नितीन गडकरी यांच्या उपस्थितीत भाजप प्रणित राष्ट्रीय स्तरावरच्या नवभरतीय शिव वाहतूक संघटनेचा उद्घाटन सोहळा दुपारी पार पडला. याच वेळी सिनेअभिनेत्री ईशा कोपीकरचा भाजपमध्ये जाहीर प्रवेश झाला. ईशा कोपीकरला वाहतूक संघटनेचे राष्ट्रीय कार्याध्यक्षपदाचे नियुक्ती पत्र देत केंद्रीयमंत्री गडकरी यांनी तीचे पक्षात स्वागत केले.
या सोहळ्याला संघटनेचे प्रमुख आणि राज्य अल्पसंख्याक आयोगाचे अध्यक्ष हाजी अरफात शेख, शिक्षण मंत्री विनोद तावडे, भाजपचे मुंबई प्रदेश अध्यक्ष आशिष शेलार, खासदार अमर साबळे, आमदार कॅप्टन तमिळ सेलव्हन हे उपस्थित होते.
वाहतुकदारानी सुरक्षित, फायदेशीर, प्रदूषण मुक्त वाहतूक करावी, यासाठी भाजप सरकारने नव्या आधुनिक तंत्रज्ञानाचा वापर सुरू केला असून जलवाहतूक वाढवण्याचे प्रयत्न सुरू केले असल्याचे यावेळी नितीन गडकरी म्हणाले.
मुळात साडेसात लाख मेंबर्सशिप असलेल्या हाजी अरफात शेख यांच्या नेतृत्वाखाली वाहतूक सेना ही शिवसेना प्रणित होती परंतु राज्य अल्पसंख्याक आयोगाच्या अध्यक्ष पदावर नियुक्ती झाल्याने संघटनेचे नेते हाजी अरफात शेख यांनी भाजपात प्रवेश केला तेव्हा पासून वाहतूक सेनेबाबत सर्वांनाच उत्सुकता होती. भाजपने आता या संघटनेची घोषणा करत सेनेवर कुरघोडी केली आहे, असे मानले जाते.
त्यातच ईशा कोपीकर हीचा प्रवेश संघटनेमध्ये चैतन्य निर्माण करेल, असा विश्वास हाजी अरफात शेख यांनी यावेळी व्यक्त केला.
माझ्यासाठी हा अत्यंत अविस्मरणीय आणि महत्वाचा क्षण असल्याचा ते म्हणाले. मी वाहतुकदारांसाठी पूर्वीही लढत होतो आताही लढतो आहे आणि भविष्यातही अखेरपर्यंत लढत राहीन असे ते म्हणाले. माझे वडील जेव्हा इस्पितळात कोमामध्ये अखेरचा जीवन संघर्ष करत होते तेव्हाही मी ताज हॉटेलच्या कामगारांसाठी लढत होतो आजही तीच स्तिथी आहे आमच्या कुटुंबाचे मुख्य पीर बाबा मखमली यांनी अखेरचा स्वास घेतला आहे, त्यांचा दफनविधी अजून बाकी आहे, तरी मी राष्ट्रीय स्तरावर वाहतुकदारांच्या संघर्षासाठी आज ईथे उभा आहे, संघटनेची मशाल अशीच तेवत ठेवा, असे भावनिक आवाहन त्यांनी उपस्थीत रिक्षा, टॅक्सी, टेम्पो आणि ट्रक चालक मालक वाहतुकदारांना केले.
