पुणे:पुणे सातारा रस्त्यावरील चव्हाणनगर कमानी जवळ सुमारे 15 तास विद्युत पुरवठा खंडित झाल्याप्रकरणी महावितरणने सायंकाळी 6 वाजता वीज पुरवठा सुरळीत होणे अपेक्षित असताना तो रात्री १२ वाजता सुरु झाला ,या विलंबा मागे पावसाला २ तासासाठी कारणीभूत धरून अन्य तासांच्या विलंबासाठी ठेकेदाराला कारणीभूत धरले आहे आणि संबधित ठेकेदारास नोटीस बजावली आहे .काल विना पूर्व सूचना दुरुस्तीचे काम सुरु करण्यात आले होते मात्र यावर ग्राहकांना एस एम एस द्वारे आपत्कालीन कामाबाबत सूचित केले होते असा पवित्रा घेतला आहे.
याप्रकरणी महावितरणाने ‘माय मराठी ‘कडे केलेल्या खुलाशात म्हटले आहे कि,
पंचवटी उपकेंद्रातून निघालेल्या 22 केव्ही वाहिनीवरील फिडर पिलरमध्ये सतत बिघाड होत असल्याने त्याठिकाणी नवीन रिंग मेन युनिट बसविण्याच्या आपत्कालिन कामास बुधवारी (दि. 26) विलंब झाल्यामुळे पद्मावती परिसरात पंचवटी सोसायटी व निर्मल पार्क सोसायटीमधील वीजपुरवठा रात्री 11.58 वाजता सुरळीत झाला.
याबाबत माहिती अशी, की पद्मावती विभाग अंतर्गत पंचवटी उपकेंद्रातून 22 केव्ही भूमिगत वाहिनीद्वारे सुमारे 8 हजार ग्राहकांना वीजपुरवठा करण्यात येतो. मात्र या वाहिनीवरील पंचवटी येथे असलेल्या 22 केव्ही फिडर पिलरमध्ये आर्द्गता व पावसामुळे वारंवार बिघाड होत असल्याचे निदर्शनास आले. नुकत्याच झालेल्या पावसामुळे या फिडर पिलरमध्ये बिघाड झाल्याने वाहिनीवरील 8 हजार ग्राहकांची वीज खंडित झाली होती. त्यामुळे या फिडर पिलरच्या ठिकाणी नवीन रिंग मेन युनिट लावण्याचे काम बुधवारी (दि. 26) सकाळी 9.10 वाजता तातडीने सुरु करण्यात आले.
सर्व ग्राहकांचा वीजपुरवठा पर्यायी व्यवस्थेतून सुरु करण्यात आला. मात्र पंचवटी सोसायटी व निर्मल पार्क सोसायटीमध्ये ओव्हरहेड वीजवाहिनी असल्यामुळे तेथील सुमारे 550 ग्राहकांसाठी वीजपुरवठ्याची पर्यायी व्यवस्था होऊ शकली नाही. महावितरणकडून या वीजवाहिनीवरील ग्राहकांना एसएमएसद्वारे आपत्कालिन कामाची माहिती देण्यात आली होती. सायंकाळी 6 वाजेपर्यंत रिंग मेन युनिटचे काम अपेक्षीत असताना दुपारी दोन तास पाऊस झाल्याने कामामध्ये मोठे अडथळे आले. रिंग मेन युनिटमध्ये वाहिन्या जोडण्यांच्या कामांना विलंब झालात्यानंतर रात्री 11.58 वाजता काम पूर्ण झाले व लगेचच वीजपुरवठा सुरु करण्यात आला. या कामाची सक्रीय देखरेख करण्यासाठी कार्यकारी अभियंता श्री. मधुसुदन बरकडे, प्रभारी अतिरिक्त कार्यकारी अभियंता श्री. राहुल बेंद्रे व सहाय्यक अभियंता सौ. अंजली मोने व महावितरणचे कर्मचारी उपस्थित होते.
रिंग मेन युनिट बसविण्याच्या कामामध्ये पावसामुळे विलंब झाला असला तरी संबंधीत कंत्राटदाराकडून योग्य व अपेक्षित वेगाने काम झालेले नसल्याचे दिसून आले. याप्रकरणी संबंधित कंत्राटदारास नोटीस बजावण्यात आली आहे. नवीन रिंग मेन युनिटमुळे आता 22 केव्ही भूमिगत वाहिनीद्वारे पंचवटी सोसायटी व निर्मल पार्कसह सर्वच सुमारे 8 हजार वीजग्राहकांना सुरळीत वीजपुरवठा होणार आहे. रिंग मेन युनिटवर पावसाचा कोणताही परिणाम होत नाही. तसेच पर्यायी वीजपुरवठा तात्काळ करण्याची सोय उपलब्ध असल्याने फिडर पिलरऐवजी रिंग मेन युनिट बसविणे गरजेचे होते.
