पुणे, दि. 29 : शहरातील वडगाव शेरी येथील मे. वसुंधरा पॉलिप्लास्ट कारखान्यात ‘रिमोट कंट्रोल’ द्वारे सुरु असलेली वीजचोरी महावितरणने उघडकीस आणली आहे. यात 2,21,676 युनिटची म्हणजे 28,79,875 रुपयांची वीजचोरी आढळून आली. याप्रकरणी कारखान्याच्या मालकाविरुद्ध सोमवारी (दि. 29) फौजदारी गुन्हा दाखल झाला.
याबाबत माहिती अशी, की नगररोड विभाग अंतर्गत वडगाव शेरीमधील टेम्पो चौक येथे वसुंधरा पॉलिप्लास्ट हा प्लॅस्टिक मोल्डींगचा कारखाना आहे. या कारखान्यात औद्योगिक वीजजोडणी आहे. तथापि या कारखान्यातील वीजवापराबाबत संशय निर्माण झाल्यामुळे वीजमीटरच्या यंत्रणेची तपासणी करण्यात आली. यामध्ये वीजमीटर यंत्रणेतील वायरिंगमध्ये फेरफार करून सीटीमध्ये (करंट ट्रान्सफॉर्मर) रिमोट कंट्रोलचे अतिरिक्त सर्कीट समाविष्ट केल्याचे आढळून आले. या सर्कीटच्या सहाय्याने वीजप्रवाह सुरु असतानाही रिमोट कंट्रोलद्वारे मीटरमधील वीज वापराची नोंद सोयीनुसार थांबविता येत असल्याचे दिसून आले व एकूण 2,21,676 युनिटची म्हणजे 28 लाख 79 हजार 875 रुपयांची वीजचोरी झाल्याचे आढळून आले.
ही वीजचोरी उघडकीस आणण्यासाठी मुख्य अभियंता श्री. रामराव मुंडे यांच्या मार्गदर्शनात अधीक्षक अभियंता श्री. सुंदर लटपटे, श्री. रमेश मलामे, कार्यकारी अभियंता श्री. किशोर पाटील, श्री. अंकुर कावळे, अतिरिक्त कार्यकारी अभियंता श्री. वसंत होनराव, श्री. उदय भोसले, सहाय्यक अभियंता श्री. कैलास कांबळे, अपर्णा माळी, कल्पना चौधरी, तंत्रज्ञ सर्वश्री मच्छिंद्ग बोराडे, साईनाथ दांगडे, संदीप राऊत आदींनी योगदान दिले.
वीजचोरीप्रकरणी वसुंधरा पॉलिप्लास्टचे मालक रितेश मोहनलाल माली विरुद्ध सोमवारी (दि. 29) रास्तापेठ (पुणे) येथील महावितरण पोलीस ठाण्यात भारतीय विद्युत कायदा 2003 नुसार कलम 135 अन्वये गुन्हा दाखल करण्यात आला आहे.
