सर्वाधिक मतदान होण्यासाठी कार्यकर्ता काम करेल
खासदार संजय काकडेंना विश्वास
भोर : भोर व वेल्हा भागातील धरणग्रस्तांचे पूनर्वसणाचे प्रश्न आणि इतर विकासाभिमुख कामे मार्गी लावू. या भागाचा सर्वांगीण विकास करण्यासाठी सर्वोतोपरी सहकार्य करण्यात येईल, असा शब्द खासदार संजय काकडे यांनी आज भोर तालुक्यातील कार्यकर्ता मेळाव्यात दिला. तसेच, लोकसभा निवडणुकीत कार्यकर्त्यांनी भाजपाच्या उमेदवार कांचन कुल यांना निवडून आणण्यासाठी सर्वोतोपरी सहकार्य करावे आणि जास्तीत जास्त मतदान होण्यासाठी काम करावे, असेही खासदार काकडे म्हणाले.
बारामती लोकसभा मतदार संघाच्या भाजप, शिवसेना व मित्रपक्ष महायुतीच्या उमेदवार सौ. कांचन कुल यांच्या प्रचारार्थ भोर व वेल्हा विभागातील कार्यकर्त्यांचा मेळावा आयोजित करण्यात आला होता. यावेळी प्रचार कार्यालयाचे उद्घाटन करण्यात आले आणि निवडणुकीच्या नियोजनासंदर्भात त्यांना मार्गदर्शन केले. याप्रसंगी बारामती लोकसभा मतदारसंघाचे प्रचार प्रमुख राजेश पांडे, शिवसेनेचे कुलदीप कोंडे शिवसेना, नगरसेवक शंकर पवार व राजेंद्र शिळीमकर, भाजप माथाडी संघटनेचे अध्यक्ष दिनेश धाडवे, पप्पू घोलप आणि भोर विधानसभा मतदारसंघातील भाजप, शिवसेना, रिपाइं, रासप महायुतीचे कार्यकर्ते मोठ्या संख्येने उपस्थित होते.
भोर आणि वेल्हा परिसरातील बहुसंख्य नागरिकांचे पूनर्वसनाचे प्रश्न गेल्या अनेक वर्षांपासून प्रलंबित आहेत. राज्यात भाजप-शिवसेनेचे सरकार असून, या भागातील धरणग्रस्तांच्या पूनर्वसनाचे प्रलंबित प्रश्न सोडविण्यासाठी निश्चित प्रयत्न करणार असल्याचे खासदार संजय काकडे यांनी सांगितले.
