भाजपतर्फे माधुरी सहस्त्रबुद्धे,योगेश मुळीक यांनी ठाकरेंच्या सेनेकडून परेश खांडके वसंत मोरे यांनी अर्ज भरला

पुणे :

महापालिकेच्या निवडणुकीसाठी प्रमुख राजकीय पक्षांनी उमेदवारी यादी जाहीर केली नसली तरी सर्वच राजकीय पक्षांच्या काही इच्छुकांनी ए-बी फॉर्मची वाट न पाहता अर्ज दाखल केले आहेत. काल २५ जणांनी अर्ज दाखल केले असून एक हजार २०६ जणांनी अर्ज विकत घेतले आहेत.
महापालिका निवडणुकीसाठी महायुती व महाविकास आघाडीतील जागा वाटप अद्याप निश्चित झालेले नाही. कोणाला किती जागा द्यायच्या व कोणती जागा द्यायची, यावरून प्रचंड वादावादी सुरु असून, एकमत होण्यास उशीर होत आहे. त्यामुळे इच्छुक उमेदवारांमध्ये अस्वस्थता वाढत आहे. आज प्रभाग क्रमांक २९ एरंडवणे-हॅपी कॉलनीतून भाजपतर्फे माधुरी सहस्त्रबुद्धे, प्रभाग कल्याणीनगर-वडगावशेरीतून योगेश मुळीक, रूपाली तारळकर, प्रभाग २ फुलेनगर-नागपूरचाळीमधून शामा जाधव, प्रभाग ४ खराडी-वाघोलीमधून प्रदीप सातव, प्रभाग ७ गोखलेनगर-वाकडेवाडीतून ओंकार कदम यांनी अर्ज भरले आहेत.काँग्रेसतर्फे प्रभाग २७ नवी पेठ-पर्वतीमधून किरण मात्रे, प्रभाग १३ पुणे स्टेशन-जयजवाननगरमधून मेहमूद नदाफ तर प्रभाग ४ मधून रमेश पहऱ्हाड यांनी अर्ज भरला आहे.शिवसेना उद्धव बाळासाहेब ठाकरे पक्षाकडून प्रभाग २५ शनिवार पेठ-महात्मा फुले मंडईमधून परेश खांडके, प्रभाग ३८ बालाजीनगर-आंबेगाव-कात्रजमधून वसंत मोरे यांनी अर्ज भरला आहे. राष्ट्रवादी काँग्रेसतर्फे प्रभाग ३९ अप्पर-सुपर इंदिरानगरमधून अभिलाषा घाटे, प्रभाग १३ मधून नितीन रोकडे, प्रभाग ४ मधून तेजश्री पऱ्हाड, राष्ट्रवादी काँग्रेस शरदचंद्र पवार पक्षातर्फे प्रभाग ४ मधून प्रकाश जमधडे, विनिता जमधडे यांनी अर्ज दाखल केले आहेत. या उमेदवारांनी अर्ज भरले असले तरी ते पक्षाचे अधिकृत उमेदवार असल्याचे अद्याप जाहीर करण्यात आलेले नाहीत.