पुणे-आगामी महानगरपालिका निवडणुकीच्या तयारीत राष्ट्रवादी काँग्रेस पार्टी शरदचंद्र पवार पक्षाचे शहराध्यक्ष प्रशांत जगताप यांनी जाहीर केल्याप्रमाणे राष्ट्रवादी काँग्रेस भवन, शिवाजीनगर येथे इच्छुक उमेदवारांच्या मुलाखतींचा कार्यक्रम आयोजित करण्यात आला. यावेळी शहरातील ८ विधानसभा मतदारसंघातून तब्बल २५२ इच्छुक उमेदवारांनी मुलाखती दिल्या.
राष्ट्रवादी काँग्रेस पार्टी शरदचंद्र पवार पक्षाकडे असलेला इच्छुक उमेदवारांचा हा कल जनतेच्या मनातील कौल स्पष्ट करणारा आहे अशी भावना शहराध्यक्ष प्रशांत जगताप यांनी व्यक्त केली. महाविकास आघाडीच्या माध्यमातून निवडणूक लढण्याचे प्रयत्न सुरू असले तरी स्वबळावर देखील निवडणूक लढण्यासाठी आम्ही सज्ज आहे. कोणत्याही परिस्थितीत भाजपसोबत आम्ही हात मिळवणी करणार नाही. भाजपने स्मार्ट सिटीच्या नावाखाली शहर बकाल करण्याचे काम केले असून कोणताही ठोस विकास त्यांना करता आलेला नाही.राष्ट्रवादी काँग्रेस पक्ष शरदचंद्र पवार पक्षाचे नेते शशिकांत शिंदे हे शहरातील सर्व इच्छुक उमेदवारांशी आज संवाद साधून त्यांची मते देखील जाणून घेणार आहेत असे यावेळी जगताप यांनी सांगितले आहे.
आ.बापूसाहेब पठारे, माजी.खा. वंदना चव्हाण, माजी.आ. अशोकबापू पवार, माजी. आ. जयदेवराव गायकवाड, अंकुश काकडे, अश्विनी कदम,रवींद्रअण्णा माळवदकर, भगवानराव साळुंखे, डॉ. सुनील जगताप, निलेश निकम, विशाल तांबे, काकासाहेब चव्हाण, स्वाती पोकळे, उदय महाले, पंडित कांबळे यांच्यासह शहरातील प्रमुख नेत्यांच्या उपस्थितीत सर्व इच्छुक उमेदवारांच्या मुलाखती झाल्या आहेत.
