ठाणे- महापालिकेच्या कळवामधील छत्रपती शिवाजी महाराज या रुग्णालयात शुक्रवारीच पाच रुग्णांचा मृत्यू झाल्याने खळबळ उडाली होती. या घटनेला दोन दिवस उलटत नाही तोच आता एका रात्रीत या रुग्णालयात तब्बल 17 रुग्णांचा मृत्यू झाल्याची धक्कादायक बाब समोर आली आहे. विशेष म्हणजे या घटनांमुळे मुख्यमंत्री एकनाथ शिंदेंच्याच ठाणे जिल्ह्यातील पालिका रुग्णालयांमधील अनागोंदी कारभार समोर आला आहे.
अपुरी डॉक्टर क्षमता आणि रुग्णांच्या संख्येत झालेली वाढ यामुळे एकच रात्री 17 रुग्णांना जीव गमवावा लागल्याचे समोर येत आहे. यातील 13 रुग्ण हे आयसीयू मधील तर 4 रुग्ण जनरल वॉर्ड मध्ये होते. रुग्णालयातील प्रशासनाने या बातमीला दुजोरा दिला आहे. दरम्यान, काही रुग्ण खासगी हॉस्पिटलमधून शेवटच्या क्षणी आल्याने आणि काही रुग्ण 80 पेक्षा जास्त वयाचे असल्याने मृत्यू झाल्याचे सांगण्यात आले आहे. दरम्यान, शिंदे गटाचे प्रवक्ते नरेश म्हस्के यांनी रुग्णालयात डॉक्टरांची कमतरता असल्याचे कबुल केले आहे. तसेच, या रुग्णालयात लवकरच डॉक्टरांची भरती करून रुग्णांना उत्तम आरोग्यसेवा देण्यासाठी प्रयत्न करू, असे म्हस्के यांनी सांगितले.
दरम्यान, ठाण्यातील सिव्हील रुग्णालय बंद असल्याने सर्व ठाणे जिल्ह्यातील रुग्ण या ठिकाणी उपचारांसाठी येत आहेत. त्यासाठी डॉक्टर आणि वैद्यकीय यंत्रणा कमी पडत असल्याची स्थिती आहे. त्यामुळे शुक्रवारी 10 तारखेला एकच दिवशी 5 जणांचा मृत्यू झाला होता. त्यावेळी आमदार जितेंद्र आव्हाड आणि इतर पक्षांनी रुग्णालयात जाऊन रुग्णालयाची पाहणी केली होती. आता केवळ शनिवारी रात्री 10.30 पासून सकाळी 8.30 पर्यंत 17 जणांचा मृत्यू झाल्याची धक्कादायक बाब समोर आली आहे.
दरम्यान, शुक्रवारी ज्या रुग्णांचा मृत्यू झाला होता, त्यांच्या नातेवाईकांनी रुग्णालय प्रशासनावर गंभीर आरोप केले आहेत. रुग्णांना तपसण्यासाठी डॉक्टर येत नव्हते, रुग्णांना वेळेवर औषध दिले जात नव्हते, असा आरोप नातेवाईकांनी केला आहे. रुग्णालयात उपचार न मिळाल्यानेच रुग्णांचा मृत्यू झाल्याचे नातेवाईकांचे म्हणणे आहे.
शनिवारी रात्री मृत्यूमुखी पडलेल्या एका रुग्णाच्या नातेवाईकाने माध्यमांशी बोलताना सांगितले की, आमच्या एका पाहुण्याला डायबिटीस आणि इतर त्रास असल्याने रुग्णालयात दाखल केले होते. नंतर प्रकृती गंभीर झाल्याने त्यांना आयसीयूत दाखल केले. मात्र, त्यांना इन्सुलिन दिले गेले नाही. आम्ही वारंवार ते देण्याची विनंती करत होतो. रुग्णाकडे नातेवाईकांनाही दिले जाऊ जात नव्हते. त्यामुळे रुग्णांना वेळेवर गोळ्या, जेवण याकडे पूर्ण दुर्लक्ष होत होते. नातेवाईक काही म्हटले तर त्यांना बाहेर हाकलले जात होते. आयसीयूतच रुग्णांची अशी हेळसांड असेल तर जनरल वॉर्डात किती भीषण स्थिती असेल याची कल्पना आपण करू शकता.
