पुणे-एकत्रित आत्महत्या करण्यास नकार दिल्यामुळे एकाने आपल्या प्रेयसी तरुणीचा वायरने गळा आवळून खून करण्याचा प्रयत्न केला. त्यानंतर तरुणाने स्वत:ला जखमी करून घेतल्याची घटना कात्रज-कोंढवा रस्ता परिसरात घडली.या प्रकरणी एका १९ वर्षीय तरुणीने फिर्याद दिली आहे. त्यावरून योगेश प्रकाश थोरात (वय २८, रा. साकुर्डी, सातारा) याच्याविरुद्ध कोंढवा पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, योगेश थोरात याने तरुणीला विवाहाचे आमिष दाखवून पळवून नेले.काही दिवसांपासून ते दोघे कोंढवा परिसरात राहत होते. १९ जुलै रोजी योगेश याने तरुणीला जातिवाचक शिवीगाळ करून आपण एकत्र आत्महत्या करु, असे सांगितले. त्यावर तरुणीने आत्महत्या करण्यास नकार दिला.त्यामुळे योगेश याने मोबाईल चार्जरच्या वायरने तिचा गळा आवळून खून करण्याचा प्रयत्न केला. परंतु तरुणीने त्याच्या तावडीतून सुटका करून घेतली. त्यानंतर योगेशने स्वत:ला जखमी करून घेत छतावरुन उडी मारुन आत्महत्येचा प्रयत्न केला. योगेश याला ससून रुग्णालयात दाखल केले असून, त्याच्यावर उपचार सुरू असल्याचे वरिष्ठ पोलिस निरीक्षक संतोष सोनवणे यांनी सांगितले.