पुणे-MPSC टॉपर दर्शना पवारच्या हत्येमुळे अवघ्या महाष्ट्रात खळबळ माजली असताना पुण्यातच MPSC ची तयारी करणाऱ्या आणखी एका मुलीवर प्राणघातक हल्ला झाला आहे. आरोपी तरुणाने पीडित तरुणीवर भररस्त्यात कोयत्याने हल्ला केला. पण 2 विद्यार्थ्यांनी दाखवलेल्या धाडसामुळे या तरुणीचे प्राण वाचले. पोलिसांनी या प्रकरणी आरोपीच्या मुसक्या आवळल्यात संपूर्ण घटनाक्रम सांगितला आहे.
पुण्यातील टिळक रोड वरून भरत नाट्य मंदिराकडे येणाऱ्या रस्त्याच्या भागात मंगळवारी सकाळी तरुण व तरुणी स्कुटीवरून जात होते. एमपीएसीची तयारी करत असल्याने दोघेही अभ्यासिकच्या दिशेने निघाले होते. त्याचवेळी शंतनू जाधव नामक आरोपी तरुणाने त्यांना रोखले. हे पाहून तरुणीच्या मित्राने त्याला थांबवण्याचे कारण विचारले. त्यावर शंतनूने आपल्या बॅगमधून कोयता काढून तरुणीवर हल्ला करण्याचा प्रयत्न केला. हे पाहून तरुणीने धावत जात स्वतःचे प्राण वाचवण्याचा प्रयत्न केला. तर तिच्या मित्राने शंतनूला रोखण्याचा प्रयत्न केला. या घटनेत तो ही जखमी झाला आहे.
पीडित तरुणी जखमी अवस्थेत धावत होती. पण कुणीही तिच्या मदतीला पुढे आले नाही. अखेर लेशपाल जवळगे नामक तरुणाने पुढे येत तिला मदत केली. आरोपी शंतनू पीडित तरुणीच्या डोक्यात वार करण्याच्या प्रयत्नांत असताना लेशपालने त्याला रोखले. त्याचा कोयता हातात पकडला. त्यानंतर घटनास्थळावरील इतर नागरिकांनीही धाव घेतली. यावेळी त्यांनी आरोपीला चांगलाच चोप दिला. पीडित तरुणीवर सध्या स्थानिक रुग्णालयात उपचार सुरू आहेत.
पोलिस उपायुक्त संदीप गिल यांनी या संपूर्ण घटनाक्रमाची माहिती दिली. ते म्हणाले की, आज 10 च्या सुमारास, एसपी कॉलेजकडे जाणाऱ्या रस्त्यावर आरोपी शंतनू व पीडित तरुणीची भेट झाली. या दोघांची पूर्वीपासूनच ओळख होती. दोघे एकाच कॉलेजमध्ये होते. त्यामुळे ते एकमेकांना चांगले ओळखत होते. पण काही कारणाने दोघांचे बोलणे बंद झाले होते. पण त्यानंतरही शंतनू तिच्यावर बोलण्यासाठी दबाव टाकत होता. तो तिला वारंवार फोन करत होता. त्याने आजही तिच्याशी बोलण्याचा प्रयत्न केला. यावरून त्यांच्यात वाद झाला. त्यानंतर अचानक त्याने तिच्यावर हल्ला केला. त्यात पीडित तरुणीच्या हातावर व डोक्यावर जखम झाली आहे. या प्रकरणी आरोपीवर गुन्हा दाखल करण्यात आला आहे.
