पुणे -कमानेवाला खायेगा, लुटनेवाला जायेगा, नया जमाना आयेगा अशी घोषणा आज येथे प्रख्यात अभिनेत्री शबाना आझमी यांनी दिली तर प्रख्यात गीतकार जावेद अख्तर म्हणाले, काही लोक काल चक्र उलटे फिरबून मागील काळ पुन्हा आणू पहात आहेत, मात्र असे कधी ही शक्य होत नाही हे ते विसरलेत, काळ कधी मागे जात नाही, तो पुढे पुढेच जात राहतो… या दोहोंनी आज राष्ट्रवादीचे अध्यक्ष शरद पवार, खासदार सुप्रिया सुळे, फौजिया खान यांच्या उपस्थितीत पुणे येथे यशवंतराव चव्हाण सेंटरतर्फे आयोजित यशस्विनी सन्मान पुरस्कार वितरण सोहळ्यास उपस्थित राहून विविध क्षेत्रांमध्ये कर्तृत्व गाजवणाऱ्या महिलांचा गौरव केला.
यावेळी शरद पवार म्हणाले, नारी शक्तीच्या कर्तृत्वाला प्रोत्साहन देणारा असा हा आजचा सोहळा आहे. गेल्या काही वर्षांपासून यशस्विनीच्या माध्यमातून महाराष्ट्रातील अनेक जिल्ह्यांमध्ये आपले सहकारी वेगवेगळ्या क्षेत्रात काम करत आहेत. त्यामधून एक गोष्ट स्पष्ट होते की कर्तृत्वाचा वारसा हा केवळ पुरुषांकडे नाही. संधी मिळाली तर कर्तृत्व गाजवण्याबाबत मुली किंवा स्त्रिया कधीही कमी पडत नाहीत. याठिकाणी महिला धोरणाचा उल्लेख करण्यात आला. आम्ही महिला धोरण ठरवले आणि काही नवे कायदे केले. हे करताना त्याचे स्वागत झाले असे नाही. सुरुवातीच्या काळात याला छुपा विरोध झाला. मात्र मला आनंद आहे की हे महिला धोरण संपूर्ण देशाने स्वीकारले. त्यामुळे अनेक क्षेत्रात अतिशय उत्तम कर्तृत्व मुली दाखवत आहेत. ज्यातून देशाला पुढे नेण्यासाठी योगदान मिळत आहे. या सर्व निर्णयाबद्दल मला कोणी विचारते तेव्हा मला माझी आई आठवते. माझ्यावर जे संस्कार घडले, जे विचार आले, त्यामागे माझी आई आहे. तिच्या कष्टांमुळेच कुठल्याही क्षेत्रात आपण यशस्वी होऊ शकतो हे चित्र घरात निर्माण झाले. त्यामुळे आम्ही सर्व भावंडं जीवनाच्या विविध क्षेत्रात यशस्वी झालो. एखादी भगिनी एक व्यक्तिमत्व कसे घडवते, एक कुटुंब कसे घडवते, याची शेकडो उदाहरणं आहेत. त्यामुळे अशी उदाहरणं देण्यासंबंधीची दृष्टी आणि कर्तृत्व ज्या व्यक्तींकडे आहे त्यांचा सन्मान केला पाहिजे. निर्णय घेण्याच्या प्रक्रियेत त्यांना अधिकार दिला पाहिजे. हे जसे आपण करत राहू तसा हा देश आणि समाज बदलल्याशिवाय राहणार नाही. आज देशात जे बदल दिसत आहेत त्यात पुरूष आणि महिलांच्या अधिकारात निर्णय घेण्याच्या प्रक्रियेत काही अंतर नाही. देशात स्वातंत्र्यानंतरच्या शक्तीशाली प्रधानमंत्री कोण हे विचारल्यावर इंदिरा गांधी हे उत्तर येते. याचे महत्त्वाचे कारण म्हणजे इंदिरा गांधींनी देशात एक प्रतिष्ठा देण्याचे काम केले. रशियासारख्या बलाढ्य देशाने तेव्हा आपल्या देशाच्या प्रधानमंत्र्यांचा जो सन्मान करायला हवा होता तो केला नाही म्हणून आपला स्वाभिमान गहाण टाकू शकत नाही, हे दाखवण्याची भूमिका तेव्हा इंदिरा गांधींनी घेतली. त्या एक शक्तीशाली प्रधानमंत्री होत्या म्हणून हे घडलं. कर्तृत्व दाखवण्याऱ्या यशस्विनींचा सन्मान याठिकाणी झाला. त्याबद्दल यशस्विनी आणि सर्व टीमचे पुनश्च अभिनंदन करतो.असेही पवार म्हणाले .
