पुणे- पुण्यातील वारजे परिसरात कोयते हातात घेऊन एका टोळक्याने सार्वजनिक रस्त्यावर सात ते आठ वाहनांची तोडफोड केल्याची घटना धक्कादायक घटना घडली. त्यानंतर दुसऱ्याच दिवशी मंगळवारी सकाळी पुण्यातील सहकारनगर परिसरातील वनशिव झोपडपट्टी परिसरात एक टोळक्याने रस्त्यावर पार्किंग करण्यात आलेल्या तब्बल 30 वाहनांची तोडफोड करत धिंगाणा घातल्याचा प्रकार उघडकीस आला आहे.ण्यातील तळजाई परिसरात वनशिव झोपडपट्टी परिसरात मंगळवारी सकाळी तोंडाला रुमाल बांधून सहा जणांचे टोळके आले होते. संबंधित टोळक्याने रस्त्यावर पार्किंग करण्यात आलेल्या रिक्षा, दुचाकी, तीन चाकी टेम्पो, कार आदी वाहनाचे काचा फोडून तोडफोड करत दहशत निर्माण करण्याचा प्रकार केला आहे.
या घटनेची माहिती मिळताच सहकारनगर पोलिस घटनास्थळी दाखल झाले. त्यांनी घटनेची माहिती घेत संबंधित आरोपींचा शोध सुरू केला आहे .दरम्यान पुण्यातील कायदा अन् सुव्यवस्थेचा प्रश्न बिकट झाल्याचे या निमित्ताने दिसून येऊ लागले आहे. राष्ट्रवादी काँग्रेस पक्षाच्या खासदार सुप्रिया सुळे यांनी पुण्यातील कोयता टोळीच्या दहशतीवर गृहमंत्री देवेंद्र फडणवीस यांनी लक्ष घालावे आणि पोलिसांना आवश्यक त्या सूचना देऊन उपाययोजना कराव्यात अशी मागणी केलेली आहे.