पुणे-पालकमंत्री चंद्रकांतदादा पाटील यांचा काल १० जून रोजी वाढदिवस मोठ्या उत्साहात साजरा झाला. पुणे जिल्ह्यातून सर्वच स्तरातून नामदार पाटील यांच्यावर शुभेच्छांचा वर्षाव करण्यात आला. शुक्रवारी रात्री कोथरूड मधील निवासस्थानी अनेक दिग्गज मान्यवरांनी नामदार पाटील यांची भेट घेऊन शुभेच्छा दिल्या. तर शनिवारी सकाळपासून कार्यकर्त्यांकडून नामदार पाटील यांच्यावर शुभेच्छांचा वर्षाव होत आहे.
नामदार चंद्रकांतदादा पाटील दरवर्षी आपला वाढदिवस पाश्चात्य संस्कृतीला फाटा देऊन सामाजिक बांधिलकी राखून साजरा करतात. यंदा त्यांनी आपला वाढदिवस आरोग्य सेवेसाठी समर्पित केला होता. त्यासाठी त्यांनी कार्यकर्त्यांनाही आवाहन केले होते की, वाढदिवसानिमित्त पुष्पगुच्छ अथवा भेट वस्तू न देता, आर्थिक दृष्ट्या दुर्बल कुटुंबातील रुग्णांच्या सेवेसाठी आर्थिक मदत करावी.
नामदार पाटील यांच्या आवाहनाला कार्यकर्त्यांकडून सकारात्मक प्रतिसाद मिळाला. भाजपाच्या सर्व कार्यकर्ते आणि पदाधिकाऱ्यांनी आरोग्य सेवेसाठी आर्थिक मदतीचे धनादेश त्यांच्याकडे सुपूर्द केले. तसेच जिल्ह्यातील विविध क्षेत्रातील मान्यवरांकडून ही नामदार पाटील यांचे अभिष्टचिंतन करण्यात आले.
राज्य सहकार परिषदेचे अध्यक्ष विद्याधर अनास्कर, आ. माधुरीताई मिसाळ, अश्विनी जगताप, भीमराव तापकीर, रविंद्र धनगेकर, भाजपा पुणे शहर अध्यक्ष जगदीश मुळीक, धीरज घाटे, राज्य महिला आयोगाच्या अध्यक्षा रुपाली चाकणकर, हेमंत रासने, भाजपा प्रदेश उपाध्यक्ष राजेश पांडे, सरचिटणीस मुरलीधर मोहोळ, पुणे मनपा आयुक्त विक्रम कुमार, अतिरिक्त पोलिस आयुक्त संदीप कर्णिक, पोलीस उपायुक्त सोहेल शर्मा, वाहतूक पोलीस, राष्ट्रवादी काँग्रेसचे जिल्हा अध्यक्ष प्रदीप गारटकर, शहराध्यक्ष प्रशांत जगताप, दीपक मानकर, वाहतूक पोलीस आयुक्त विजय मगर यांच्या सह विविध क्षेत्रातील मान्यवरांकडून नामदार चंद्रकांतदादा पाटील यांना वाढदिवसाच्या शुभेच्छा दिल्या.
तसेच आरोग्य सेवेसाठी मदतीचे धनादेश नामदार पाटील यांच्याकडे सुपूर्द केले. या सर्वांचेही नामदार पाटील यांनी आभार मानले. तसेच जनसेवेसाठी सदैव तत्पर असल्याची ग्वाही यानिमित्ताने दिली.
