नागपूर–
येथील चार मंदिरांमध्ये भारतीय संस्कृतीनुसार वस्त्रसंहिता (ड्रेसकोड) लागू करण्याचा निर्णय महाराष्ट्र मंदिर महासंघाने घेतला आहे. महासंघाचे समन्वयक सुनील घनवट यांनी पत्रकार परिषदेत ही माहिती दिली. इतकेच नव्हे तर राज्यातील सर्वच मंदिरांमध्ये वस्त्रसंहिता लागू करण्यासाठी व्यापक अभियान राबवून जनजागृती करणार असल्याचे त्यांनी सांगितले.
नागपूर जिल्ह्यातील श्री गोपालकृष्ण मंदिर गोरक्षण सभा (धंतोली), श्री संकटमोचन पंचमुखी हनुमान मंदिर (बेलोरी), श्री बृहस्पती मंदिर (कानोलीबारा), श्री दुर्गामाता मंदिर (हिल टॉप) या मंदिरांमध्ये वस्त्रसंहिता लागू करण्याचा निर्णय महासंघातर्फे घेण्यात आला. अंगप्रदर्शन करणारे तथा तोकडे कपडे घालून येऊ नये, असे आवाहन त्यांनी या वेळी केले.
तुळजापूर मंदिर समितीला घ्यावी लागली होती माघार
धाराशिव जिल्ह्यातील श्रीक्षेत्र तुळजापूर देवस्थानने दहा दिवसांपूर्वी ड्रेसकोडचा निर्णय जाहीर केला होता. मात्र त्याला मोठ्या प्रमाणावर विरोध करणाऱ्या प्रतिक्रिया सोशल मीडियातून आल्या. त्यामुळे देवस्थानला १२ तासांत हा निर्णय मागे घेण्याचे जाहीर करावे लागले.
