डॉ.नीलम गोऱ्हे यांचे नगरविकास प्रधान सचिव व पुणे मनपा आयुक्त यांना लेखी पत्र …
पुणे दि.२५ : पुणे महानगरपालिकेमार्फत बालभारती ते पौड फाटा लिंक रोड करण्याचे काम सध्या सुरू असलेचे समजते. त्यानुषंगाने वेताळ टेकडीवरती 250 काँक्रीट पोल्स उभे करून रस्त्याचे रेखांकन करण्यात येणार आहे. या रस्त्यावरील अनेक झाडे तोडली जाणार आहेत. याबाबत विधानपरिषद उपसभापती डॉ.नीलम गोऱ्हे यांनी दिनांक २५ एप्रिल, २०२३ रोजी लेखी पत्र पाठवून सदरहू काम थांबविणेबाबत कळवले होते. सदर पत्रामध्ये न्यायालयाच्या सूचनेप्रमाणे वृक्षतोड करू नये तसेच रहदारी कमी करण्यासाठी सदर रस्त्याचा उपयोग किती होणार आहे याचेही सर्वेक्षण करावे असे सांगितले होते. तसेच पुणे शहरातील पर्यावरण संरक्षणामध्ये काम करणाऱ्या संस्थांना सहभागी करून त्यांचे हरकतीचा सकारात्मक विचार करण्याबाबत सूचित करण्यात आले होते.
यानुसार महानगरपालिकाकडे ज्या हरकती प्राप्त आहेत त्याबाबत सविस्तर सुनावणी होईपर्यंत सदर टेकडीवरती कोणतेही कामकाज करण्यात येऊ नये तसेच वृक्षतोडही करण्यात येऊ नये अशा सूचना संबंधितांना तात्काळ देण्यात याव्यात अशी लेखी सूचना डॉ.गोऱ्हे यांनी प्रधान सचिव नगरविकास विभाग आणि मनपा आयुक्त पुणे यांना आज दिल्या.
तसेच याबाबत केलेल्या कार्यवाहीचा अहवाल सादर करण्याच्या सूचना देखील त्यांनी संबंधितांना दिल्या आहेत.
