पुणे – जिल्ह्यामधील समाजमंदिरं आणि अभ्यासिका यांची अर्धवट पडलेली कामं पूर्ण व्हावीत, अशी मागणी आमदार सिद्धार्थ शिरोळे यांनी आज (शुक्रवारी) पुणे जिल्हा नियोजन समितीच्या बैठकीत केली.
पुणे जिल्हा नियोजन समितीची बैठक पालकमंत्री चंद्रकांतदादा पाटील यांच्या अध्यक्षतेखाली विभागीय आयुक्त कार्यालयामध्ये पार पडली. या बैठकीमध्ये विविध विषय आमदार शिरोळे यांनी मांडले.
छत्रपती शिवाजीनगर मतदारसंघामध्ये अर्धवट अवस्थेत पडलेली समाजमंदीरं आणि आभ्यासिका आहेत. काही समाजमंदिरं आणि अभ्यासिका गेल्या १० वर्षांपासुन अर्धवट अवस्थेत आहेत. आमदार निधीच्या खर्चाकरीता मार्गदर्शक सूचना असतात. त्यानुसार या कामांकरिता निधी देता येत नाही. मात्र, अशी कामे पूर्ण करण्याची मागणी सतत होत असते. याकरिता अंदाजपत्रकात तरतूद करण्यात यावी, अशी अर्धवट अवस्थेतील समाजमंदिरं आणि अभ्यासिका यांची समस्या केवळ माझ्या मतदारसंघापुरती मर्यादित नसून संपूर्ण जिल्ह्यातच आहे. तरी या प्रश्नाची व्याप्ती लक्षात घेऊन अर्धवट कामे पूर्ण करण्याच्या सूचना देण्यात याव्यात, अशी मागणी आमदार शिरोळे यांनी पालकमंत्र्यांकडे केली.
महावितरणच्या विविध डीपी, ट्रान्सफॉर्मर करिता महावितरणचे एस्टिमेट झाल्यावर त्वरित मान्यता द्यावी. तसेच आय पास ची वेबसाईट सतत बंद असल्यामुळे आमदार निधी खर्चाचे स्टेट्स समजत नाही. तरी यावरही लवकरात लवकर उपाययोजना करावी, अशाही मागण्या आमदार शिरोळे यांनी बैठकीत केल्या.
