पुणे-किराणा मालांचे दुकान फोडून विक्रीसाठी प्रतिबंधित नसलेल्या सिगारेटचे बॉक्स चोरणार्या एका आंतरराज्य टोळीला पुणे पोलिसांनी गजाआड केले आहे. त्यांच्याकडून चार लाख दहा हजारांचा ऐवज जप्त केला आहे. चोरलेल्या सिगारेटचे बॉक्स कमी किंमतीत विकून चोरटे पैसे मिळवित असल्याचे तपासात उघडकीस आल्याची माहिती पोलिसांनी येथे दिली आहे.
पुण्यात १० घरफोडीचे गुन्हे दाखल असलेला अट्टल गुन्हेगार बुधाराम बियाराम चौधरी (वय -४५ रा.वडगाव शेरी, पुणे, मुळ-रा. राणी वाल, ता. जितारण, जि. पोली, राजस्थान) ; रामलाल ढगळाराम चौधरी वय २९ आणि महाविर बगदाराम मेघवंशी (वय -१९ दोघेही रा.दत्तवाडी, पुणे,मूळ-राजस्थान) अशी अटक केलेल्या आरोपीची नावे आहेत.पुण्यातील नानापेठमधील जय अंबे ट्रेडर्स किराणा दुकानाचे शटर उचकटून चोरट्यांनी पाच लाख दहा हजारांची सिगारेट पाकिटे चोरुन नुकतीच नेली होती. युनीट एककडून याबाबत आरोपींचा शोध सुरु होता. तांत्रिक विश्लेषणाव्दारे तीन जण रिक्षातून प्रवास करीत वडगाव शेरीत उतरल्याचे निष्पन्न झाले.त्यानुसार पोलीस अंमलदार आण्णा माने, अमोल पवार यांना आरोपींची माहिती मिळाली. वरिष्ठ पोलीस निरीक्षक शब्बीर सैय्यद यांच्या मार्गदर्शनाखाली पथकाने आरोपी बुधारामला ताब्यात घेतले. चौकशीत त्याने साथीदारांच्या मदतीने नाना पेठेतील दुकानातून सिगारेटची चोरी केल्याची कबुली दिली आहे. त्यानंतर त्याच्या दोन साथीदारांनाही पथकाने अटक केली.पोलिसांच्या तांत्रिक विश्लेषणाद्वारे आरोपी बुधारामने मंडईतील दुकानातूनही सिगारेट चोरल्याचे उघडकीस आले आहे. त्याच्याविरुद्ध यापुर्वी विश्रामबाग, कोंढवा, समर्थ,हडपसर परिसरात घरफोडी, चोरीचे दहा गुन्हे दाखल आहेत. ही कामगिरी पोलीस आयुक्त रितेश कुमार, सहआयुक्त संदिप कर्णिक, उपायुक्त अमोल झेंडे, एसीपी सुनिल पवार, वरिष्ठ पोलीस निरीक्षक शब्बीर सैय्यद, एपीआय आषिश कवठेकर, उपनिरीक्षक अजय जाधव, उपनिरीक्षक सुनिल कुलकर्णी,इम्रान शेख, निलेश साबळे, शुभम देसाई,दत्ता सोनावणे, महेश बामगुडे, विठ्ठल साळुंखे, अय्याज दड्डीकर, अभिनव लडकत,राहुल मखरे,शशिकांत दरेकर, अनिकेत बाबर, तुषार माळवदकर यांनी केली आहे.
