खासदारकीची शपथ संस्कृतमध्येच घ्या ,डॉ. विश्‍वनाथ दा. कराड, डॉ. विजय भटकर व पं.वसंतराव गाडगीळ यांचे आवाहन

पुणे,२७ मे : “भारत माता विश्‍वगुरू पदावर आरूढ झालेली पहायला मिळावी, यासाठी आपली खासदारकी सुफल व्हावी” अशा निर्वाचित सांसदांना अभिनंदनासह शुभेच्छा देतानांच आपण आली शपथ संस्कृत भाषा, किंवा आपली मातृभाषा किंवा आपली राष्ट्रभाषा हिंदीमध्येच घ्यावी, असे आग्रहपूर्वक आवाहन करणारे पत्र एमआयटी वर्ल्ड पीस युनिव्हर्सिटीचे संस्थापक कुलपती प्रा.डॉ. विश्‍वनाथ दा. कराड, भारत विश्‍व ज्ञानपीठम चे कुलपती पद्मश्री डॉ.विजय भटकर, शारदाज्ञानपीठमचे संस्थापक, गुरूकुलाचार्य पं.वसन्तराव गाडगीळ आणि नागपूर विद्यापीठाचे माजी कुलगुरू डॉ. एस.एन.पठाण यानी सर्व निर्वाचित सदस्यांना पाठवले आहे.
१९९१ साली लोकसभेचे सभापति डॉ. बलराम जाखड यांच्यासह ५३ सदस्यांनी सांसद म्हणून शपथ संस्कृतमध्येच घेतली होती. त्यात काँग्रेसचे ३, जनता दल १, शिवसेनेचे श्री मोरेश्‍वर सावे आणि भाजपचे ४८ सदस्य होते. ज्यांच्यात विजयाराजे सिंदिया, सुमित्रा महाजन, अण्णा जोशी, ऋता वर्मा, राम नाईक, रामभाऊ कापसे, भावना चिखलिया, महन्त अवेद्यनाथ इ. प्रमुख होते. अशी आठवण सांगून या उपक्रमाचे प्रवर्तक पं. गाडगीळ म्हणाले, “ पक्ष कोणताही असो, भाषांची आदिजननी म्हणून संस्कृतबद्दल सर्वानांच आदर आहे. यामुळे आमच्या या उपक्रमाला सर्वांचाच पाठिंबा मिळतो” शारदाज्ञानपीठमचे प्रतिनिधी राजधानीत सर्व सदस्यांना भेटून संस्कृतमध्येच सर्वाधिक सदस्यांनी शपथ घ्यावी, असे आवाहन करणार आहेत.