एमआयटीतर्फे जगातील सर्वात मोठ्या घुमटात धार्मिक वातावरणात श्री सरस्वतीदेवीच्या मूर्तीची स्थापना

पुणे- एमआयटी विश्‍वशांती विद्यापीठ व विश्‍वशांती केंद्र (आळंदी), माईर्स एमआयटी आणि एमआयटी आर्ट, डिझाईन अँड टेक्नॉलॉजी विद्यापीठातर्फे अक्षय्य तृतीयेच्या शुभ मुहूर्तावर विद्येची व ज्ञानाची देवता श्री सरस्वतीच्या मूर्तीचे विधीवत पूजन राजबाग, लोणी काळभोर येथे करण्यात आले. एमआयटी विश्‍वशांती विद्यापीठाचे संस्थापक अध्यक्ष प्रा. डॉ. विश्‍वनाथ दा. कराड व सौ. उषा विश्‍वनाथ कराड यांच्या शुभहस्ते श्री सरस्वतीदेवीच्या मूर्तीची स्थापना केली गेली. थोर साधक व तपस्वी परमपूज्य मा. श्रीकृष्ण कर्वे – कर्वेगुरुजी यांच्या शुभाशीर्वादाने हे मंगल कार्य पार पडले.
तत्त्वज्ञ संत श्री ज्ञानेश्‍वर माऊली विश्‍व शांती ग्रंथालय आणि विश्‍वशांती प्रार्थना सभागृहाच्या शिखरावरील सुमारे 190 फूट उंचीवरील मंदिरात ही मूर्ती विराजमान केली गेली. भजन, कीर्तन, होम-हवन अशा धार्मिक वातावरणात मूर्तीची स्थापना झाली.
यावेळी पं.वसंतराव गाडगीळ, डॉ. एडिसन सामराज, डॉ. बुधाजीराव मुळीक, काशीराम दादाराव कराड, प्रा. डॉ. मंगेश कराड, डॉ. सुचित्रा कराड- नागरे, प्रा. स्वाती कराड-चाटे, डॉ.एस.एन.पठाण, प्रा. शरदचंद्र दराडे-पाटील, आदिनाथ मंगेशकर, के.के.झा, प्रा. रतनलाल सोनग्रा, डॉ.सुभाष आवळे, डॉ.सुनील राय हे उपस्थित होते. तसेच, विविध क्षेत्रातील नामवंत शिक्षणतज्ञ, तत्त्वज्ञ, शास्त्रज्ञ, धर्मपंडित, विद्वान व इतर मान्यवरही उपस्थित होते.
यावेळी प्रा.डॉ. विश्‍वनाथ दा. कराड म्हणाले, या वास्तूच्या माध्यमातून धर्म, विज्ञान, तत्त्वज्ञान, संगीत कला यासारख्या विषयांचे सखोल चिंतन करून आपण जगात शांती कशी स्थापन करु शकतो, हे मांडले जाईल. स्वामी विवेकानंद यांनी सांगितल्यानुसार 21 व्या शतकात भारत विश्‍वगुरु म्हणून उदयास येईल. त्याचीच ही प्रचीती आहे. 62 हजार 500 चौरस फुटाच्या घुमटाच्या माध्यमातून संत ज्ञानेश्‍वर, संत तुकाराम यांच्यासारख्या संतांचे विचार संपूर्ण जगात पोहचविले जाईल. भारतात अंतिम सत्याचा शोध घेतला जातो आणि ज्ञानाची पूजा केली जातेे. ही आपली संस्कृती आहे. त्यामुळेच ज्ञानमयो विज्ञानमयोची प्रचीती या वास्तूच्या माध्यमातून येत आहे. येथे संतश्री ज्ञानेश्‍वर महाराज यांच्या नावाच्या ग्रंथालयात जागातील सर्व धर्मांच्या, संस्कृतींच्या, तत्त्वज्ञानांच्या , अध्यात्म आणि विज्ञानासारख्या विषयांवरील ग्रंथांचा समावेश असेल.
सरस्वती ही हिंदू धर्माची एक प्रमुख देवता आहे. तिला विद्या आणि ज्ञानाची देवी म्हणून ओळखले जातेे. सरस्वतीला साहित्य, संगीत, कला यांचीसुद्धा देवता मानले जाते. ही देवी नदी, वाणी आणि विद्येची सुद्धा अधिष्ठात्री देवता आहे. असेही ते म्हणाले.