पुणे : विश्वशांती केंद्र (आळंदी), माईर्स एमआयटी, पुणे, भारत आणि संतश्री ज्ञानेश्वर-संतश्री तुकाराम महाराज स्मृती व्याख्यानमाला न्यास यांच्या संयुक्त विद्यमाने युनेस्को अध्यासना अंतर्गत शुक्रवार, दि. २४ नोव्हेंबर ते गुरुवार, दि. ३० नोव्हेंबर २०१७ या कालावधीत २२वी तत्त्वज्ञ संतश्री ज्ञानेश्वर-तुकाराम स्मृती व्याख्यानमाला माईर्स एमआयटीच्या संतश्री ज्ञानेश्वर सभागृहात आयोजित करण्यात आली आहे.
‘विज्ञान व अध्यात्माच्या समन्वयातूनच जगामध्ये शांतता नांदेल’, हे स्वामी विवेकानंदांचे वचन व तत्त्वज्ञ संतश्री ज्ञानेश्वर माऊली व जगद्गुरु संतश्री तुकाराम महाराज यांच्या ज्ञानेश्वरी व गाथेतील ज्ञान-विज्ञानाधिष्ठित तत्त्वदर्शन हा या व्याख्यानमालेचा मुख्य हेतू आहे.
या व्याख्यानमालेसाठी शास्त्रज्ञ, तत्त्वज्ञ, तसेच, साहित्य, सामाजिक, सांस्कृतिक व शैक्षणिक क्षेत्रातील तज्ज्ञ मान्यवरांना निमंत्रित केले असून, मानवी आणि आध्यात्मिक मूल्यांचे या व्याख्यानमालेद्वारे संवर्धन व्हावे, हा या व्याख्यानमालेमागील प्रमुख उद्देश आहे.
या व्याख्यानमालेचे उद्घाटन थोर समाजसेवक मा.श्री. अण्णा हजारे यांच्या शुभहस्ते शुक्रवार, दि. २४ नोव्हेंबर २०१७ रोजी सायंकाळी ५.३० वाजता होणार आहे.
गुरुवार, दि. ३० नोव्हेंबर २०१७ रोजी सकाळी ११.०० वाजता या व्याख्यानमालेचा समारोप होणार आहे. या समारंभासाठी भारत सरकारच्या आयकर विभागाचे मुख्य सचिव मा.डॉ. ए.सी.शुक्ला हे प्रमुख पाहुणे म्हणून उपस्थित राहणार आहेत. अध्यक्षस्थानी नवी दिल्ली येथील जवाहरलाल नेहरू विद्यापीठाचे माजी कुलगुरू मा.डॉ. कपिल कपूर हे असतील. नालंदा विद्यापीठाचे कुलपती व जगविख्यात संगणकतज्ञ पद्मभूषण डॉ. विजय भटकर हे सन्माननीय अतिथी म्हणून उपस्थित राहणार आहेत.
शुक्रवार, दि. २४ नोव्हेंबर ते गुरूवार, दि. ३० नोव्हेंबर २०१७ या कालावधीत सायंकाळी ४.३० वाजता होणार्या व्याख्यानमालेत सुप्रसिध्द व्हायोलिन वादक डॉ. एन. राजम (संगीतातून ईश्वराचा साक्षात्कार), महाराष्ट्र सरकारचे सहसचिव व कायदेशीर सल्लागार श्री. मदन गोसावी (ज्ञानदेवाचा भागवत संप्रदाय आणि वर्तमान स्थिती आणि प्राप्त परिस्थिती), सुप्रसिध्द पत्रकार, राजकीय विश्लेषक व स्तंभ लेखक डॉ. वेदप्रकाश वैदिक (आशियाई महासंघ – भारताची भूमिका), भारताचे माजी केंद्रीय मंत्री डॉ. अरिफ महंमद खान (धर्म ग्रंथ हे जीवनग्रंथ आहेत) व गुजरात येथील बाप्सचे श्री. पी.पी.साधू विवेक जीवनदास (स्वतंत्रपणे विचार करा), अशा मान्यवरांची व्याख्याने होणार आहेत.
या व्याख्यानमालेला जोडूनच शनिवार, दि. २५ नोव्हेंबर ते बुधवार, दि. २९ नोव्हेंबर २०१७ पर्यंत रोज सकाळी ८.४५ ते १२.०० पर्यंत सकाळचे सत्र पार पडणार आहे. यामध्ये दीनानाथ मंगेशकर रूग्णालयाचे विश्वस्त व वैद्यकीय संचालक डॉ. धनंजय केळकर, सुप्रसिध्द गप्पाष्टककार डॉ. संजय उपाध्ये, स्वयंप्रकाशी चॅरिटेबल ट्रस्टचे संस्थापक श्री. सुनिल काळे, सुप्रसिध्द तत्त्वज्ञ आणि विचारवंत श्री. दत्तात्रय तापकीर, सावित्रीबाई फुले पुणे विद्यापीठाच्या सेंटर फॉर कॉम्प्लिमेंटरी अॅण्ड इंटिग्रेटिव्ह हेल्थचे संचालक डॉ. भूषण पटवर्धन, थोर विद्वान, तत्त्वज्ञ व वक्ते श्री. धनंजय गोखले, सुप्रसिध्द विद्वान व तत्त्वज्ञ श्री. हरी नरके, संतसाहित्याचे गाढे अभ्यासक डॉ. रामचंद्र देखणे, डॉ. बाबासाहेब आंबेडकर तंत्रज्ञान विद्यापीठाचे माजी कुलगुरू डॉ. सुभाष आवळे व एमआयटी डब्ल्यूपीयूचे कुलसचिव प्रा.(ग्रुप कॅप्टन) डी.पी.आपटे या मान्यवरांची विश्वशांती, संस्कृती व प्रबोधन इत्यादी विषयांवर व्याख्यानांची विशेष कार्यशाळाही आयोजित केली आहे.
प्रत्येक व्याख्यानानंतर वक्ता व श्रोते यांच्यामधील प्रश्नोत्तरांचा कार्यक्रम हे या व्याख्यानमालांचे वैशिष्ट्य आहे. विशेष म्हणजे या व्याख्यानमालेमध्ये दि. २५ नोव्हेंबर ते दि. २९ नोव्हेंबर २०१७ पर्यंत माईर्स एमआयटी संकुलातील शिक्षक-शिक्षकेतर कर्मचार्यांसाठी सकाळी ७.०० ते ८.०० या वेळात योगासन वर्गाचेही आयोजन योगाचार्य श्री. मारूती पाडेकर यांच्या मार्गदर्शनाखाली करण्यात आले आहे. योगासन वर्ग आयोजित करणारी माईर्स एमआयटी, पुणे ही एकमेव शैक्षणिक संस्था आहे.
सदरील सकाळ आणि संध्याकाळच्या दोन्ही सत्रातील व्याख्यानमाला विनामूल्य असून ती सर्वांसाठी खुली आहे. जास्तीत जास्त नागरिकांनी या व्याख्यानमालेचा लाभ घ्यावा, अशी संयोजकांची अपेक्षा आहे.
अशी माहिती विश्वशांती केंद्र (आळंदी), माईर्स एमआयटी, पुणेचे संस्थापक अध्यक्ष व युनेस्को अध्यासनाचे प्रमुख प्रा. डॉ. विश्वनाथ दा. कराड व २२व्या तत्त्वज्ञ संतश्री ज्ञानेश्वर-तुकाराम स्मृती व्याख्यानमालेचे समन्वयक डॉ. मिलिंद पांडे यांनी दिली.
