पुणे : पदवीधर विधान परिषद मतदारसंघाच्या निवडणुका जिंकण्यासाठी बोगस मतदार नोंदणी झाल्याचा घणाघातात राष्ट्रवादी काँग्रेसचे प्रदेशाध्यक्ष, जलसंपदा मंत्री जयंत पाटील यांनी सोमवारी पुण्यात केले. काहीही करून निवडणुका जिंकायच्याच या हव्यासातून वाटेल तो मार्ग निवडतात, याकडे लक्ष वेधत पाटील यांनी भाजपवर शरसंधान साधले.पुणे पदवीधर मतदारसंघातील महाविकास आघाडीचे उमेदवार अरुण लाड आणि शिक्षक मतदार संघातील जयंत आसगावकर यांच्या प्रचारासाठी जयंत पाटील यांच्या उपस्थितीत माजी उपमहापौर दीपक मानकर आणि मित्र परिवार आयोजित मेळावा झाला. त्यावेळी ते बोलत होते. पुणे पदवीधर महाविकास आघाडीचे अधिकृत उमेदवार श्री. अरूण गणपती लाड आणि शिक्षक मतदारसंघाचे प्रा. जयंत आजगावकर यांच्या प्रचारार्थ महाविकास आघाडी कार्यकर्ता बैठक आज दीपक मानकर आणि मित्आर परिवाराने आयोजित केली होती. राज्यमंत्री श्री. दत्तात्रय भरणे, आ. श्री. संजय शिंदे, पुणे शहराध्यक्ष, आ. श्री. चेतन तुपे-पाटील, राष्ट्रवादी काँग्रेस महिला प्रदेशाध्यक्षा रुपालीताई चाकणकर, प्रदेश प्रवक्ते श्री. अंकुश काकडे, शिवसेना शहर प्रमुख श्री. संजय मोरे, सेना गटनेते श्री. पृथ्वीराज सुतार, शिक्षक संघटनेचे श्री मारणे, तसेच पदाधिकारी आणि कार्यकर्ते उपस्थित होते. याप्रसंगी दीवा प्रतिष्ठानचे संस्थापक श्री. हर्षवर्धन मानकर यांनी स्वागत केले.
पुणे पदवीधर निवडणुकीसाठी महाविकास आघाडीचे उमेदवार अरुण लाड आदर्श उमेदवार असून त्यांच्या घराण्याची देशसेवेची परंपरा आहे. प्रश्न धसाला लावण्याची वृत्ती असलेले लाड विचारांशी तडजोड न करता प्रश्न सोडवतात. त्यामुळे पुणे पदवीधर मतदारसंघात परिवर्तन होईल, जयंत पाटील साहेब यांनी सांगितले. ‘सरकारने तिजोरी मोकळी झाल्यानंतरही कायम अनुदानित शिक्षकांच्या पुढील अनुदानाचा निर्णय घेतला. तसेच कोरोनाच्या काळात पावलोपावली भाजपाने राजकारणाची संधी साधली. एक बेजाबदार विरोधी पक्ष कसा असू शकतो? याचे उदाहरण भाजपने दिले. पदवीधरचे अधिकृत उमेदवार अरूण लाड हे प्रामाणिक, स्पष्ट वक्ता आणि विचारावर श्रद्धा असणारे क्रांतिकारकी घराण्यांची परंपरा असलेले उमेदवार आहेत. ते पदवीधरांच्या प्रश्नासाठी उभे राहतील, पदवीधरांचे प्रश्न सोडवण्यासाठी चंद्रकांत पाटील किती पुढे होते? पुणे येथील काही भागातील यादीमध्ये शंभर एक मतदारांच्या नावासमोर एकच मोबाईल नंबर आणि दिलेल्या पत्त्यावर तो मतदार रहात नाही, अशी बोगस मतदार नोंदणी झाली आहे. त्यासंबंधी निवडणुक आयोगाकडे तक्रार केली जाणार आहे, अशी माहितीही प्रदेशाध्यक्ष पाटील यांनी दिली.
राज्यमंत्री दत्तात्रय भरणे यांनी , ‘महाविकास आघाडी सरकारचे अधिकृत दोन्ही उमदेवार यांना मतदाररुपी आशिर्वाद द्यावा, व त्यांना प्रथम क्रमांकाची पसंती देऊन निवडून आणावे असे आवाहन यावेळी केले.’ पदवीधर उमेदवार अरूण लाड म्हणाले की , ‘गेल्या अकरा वर्षात मागील पदवीधर आमदार चंद्रकांत पाटील यांनी महामंडळ नेमू असे म्हंटले होते, पण केंद्रात आणि राज्यात सरकार असतानाही ते महामंडळ नेमू शकले नाहीत.’ ‘आम्ही पुणेकरांनी एकदा एखाद्या विडा उचलला की, त्याला मार्गी लावल्याशिवाय थांबणार नाही, आणि पुणे पदवीधर मतदार संघात परिवर्तन निश्चित असून पुणेकर मतदार लाड आणि प्रा. आजगावकर यांच्या पाठीशी ठामपणे उभा राहणार आहेत, अशी भूमिका यावेळी दीपक मानकर यांनी मांडली.
रुपाली चाकणकर यांनी यावेळी चंद्रकांत पाटील हे केवळ स्वतःचे अस्तित्व दाखविण्यासाठी पवारांसारख्या मोठ्या नेत्यांवर टीका करून उथळ पणा दाखवीत आहेत अशी टीका केली. तर सेनेचे संजय मोरे यांनीही कानपूर विद्यापीठाच्या बोगस पदव्यांच्या विषयावर सत्तेत असताना तक्रारी करूनही चंद्रकांत पाटलांनी त्यावर कारवाई केली नाही असा आरोप केला .
ताकदीच्या माणसाला त्रास कसा द्यायचा? हे भाजपकडून शिकावे : पाटील
‘माजी उपमहापौर दीपक मानकर यांनी अत्यंत जिव्हाळ्याने ही कार्यकर्ता बैठक आयोजित केली. बघता-बघता या बैठकीला सभेचे स्वरुप आले, आपणाकडे असलेले संघटन कौशल्य आम्ही जाणतो, पण एका ताकदीच्या माणसाला बदनाम कसे करायचे, हे भारतीय जनता पक्षाकडून शिकावे असा टोला, यावेळी पाटील यांनी भाजपला लगावला.
