स्वातंत्र्यदिन आणणार मातंग समाजाच्या इतिहासात नवी पहाट

पुणे – स्वातंत्र्यदिनाच्या संध्याकाळी मातंग समाजाच्या शिष्टमंडळाने माननीय राज्यपाल भगत सिंह कोशियारी यांची भेट घेऊन समाजाच्या विविध मागण्यांविषयी त्यांच्याशी चर्चा केली. राज्यपाल महोदयांनी ही अत्यंत सकारात्मक प्रतिसाद देत समाजाच्या मागण्या पूर्ण करण्यासाठी प्रयत्न करण्याचे आश्वासन या शिष्टमंडळाला दिले. राज्यपाल महोदयांसोबत झालेल्या या सकारात्मक भेटीमुळे मातंग समाजाच्या इतिहासात हा स्वातंत्र्यदिन नवी पहाट घेऊन येईल, असा विश्वास शिष्टमंडळातील नेत्यांनी व्यक्त केला.
माजी गृहराज्यमंत्री रमेश बागवे यांच्या नेतृत्वाखालील या शिष्टमंडळात सर्वपक्षीय नेत्यांचा समावेश होता. आरपीआय मातंग आघाडीचे प्रदेशाध्यक्ष हनुमंत साठे, शिवसेनेचे जिल्हाध्यक्ष बाळासाहेब भांडे, काँग्रेसचे विद्यमान नगरसेवक अविनाश बागवे,राष्ट्रवादी काँग्रेसचे मागासवर्गीय विभागाचे शहराध्यक्ष विजय डाकले, युवक काँग्रेसचे माजी प्रदेशाध्यक्ष मनोज कांबळे, राष्ट्रवादी काँग्रेसचे संदिपान झोंबाडे, लहुजी समता परिषदेचे अनिल हातागळे, आदींचा समावेश होता.
लोकशाहीर अण्णा भाऊ साठे यांना मरणोत्तर भारतरत्न किताबाने सन्मानित करण्यात यावे, क्रांतीवीर लहुजी साळवे यांच्या स्मारकाचे काम गतीने व्हावे, मातंग आयोगाच्या शिफारसींची अंमलबजावणी तातडीने व्हावी, लोकशाहीर अण्णाभाऊ साठे महामंडळाला तातडीने मोठ्या प्रमाणात भाग भांडवल उपलब्ध करून द्यावे, आदी मागण्या शिष्टमंडळाने राज्यपालांकडे केल्या. राज्यात विधान परिषद अस्तित्वात आल्यापासून गेल्या सहा दशकात मातंग समाजाच्या एकाही व्यक्तीला राज्यपाल नामनिर्देशित सदस्य म्हणून विधान परिषदेवर संधी मिळालेली नाही. हा अनुशेष दूर करून अण्णा भाऊ साठे जन्मशताब्दी वर्षाच्या पार्श्वभूमीवर मातंग समाजाला न्याय द्यावा, अशी विशेष मागणीही शिष्टमंडळाने केली. यावर अत्यंत सकारात्मक प्रतिक्रिया देत राज्यपालांनी मातंग समाजाच्या जास्तीत जास्त मागण्या मंजूर करण्याच्या दृष्टीने राज्य सरकारला निर्देश देऊ, असे आश्वासन या शिष्टमंडळाला दिले. राज्यपालांसोबत अत्यंत खेळीमेळीच्या वातावरणात झालेल्या या बैठकीमुळे मातंग समाजातला एक नवी ऊर्जा मिळाल्याची भावना शिष्टमंडळाच्या वतीने रमेश बागवे यांनी व्यक्त केली.