पंढरपूर : भेटीलागीं जीवा लागलीसे आस …| पाहे रात्रं-दिवस वाट तुझी || सावळ्या विठ्ठलाच्या दर्शनाची आस मनी धरुन देहू, आळंदीसह राज्याच्या कानाकोपऱ्यातून पायी निघालेल्या पालख्या रविवारी पंढरीपासून जवळच वाखरीत मुक्कामासाठी दाखल झाल्या आहेत. संतांच्या पालख्यासह वैष्णवांचा मेळा सोमवारी पंढरीकडे मार्गस्थ होणार आहे.
विठ्ठल नामाचा अखंड गजर आणि ज्ञानेश्वर माऊली… तुकाराम… या जयघोषात वारकरी देहभान विसरून पंढरीच्या वाटेवर चालत आहेत. चंद्रभागेमध्ये स्नान व विठ्ठल दर्शनाच्या ओढीने येत असलेल्या वारकऱ्यांच्या चेहऱ्यावरील आनंद आणि उत्साहाने अवघी पंढरीनगरी हरी नामाने दुमदुमली असून भक्ती रसात न्हाऊन निघाली आहे.
लाखो नयनांनी अनुभवला रिंगण सोहळा
बाजीराव विहीर येथे रविवारी माऊलींचे गोल व उभे रिंगण पार पडले. हा रिंगण सोहळा लाखो वारकरी भाविकांनी अनुभवला. अश्वाचे रिंगणामध्ये धावणे हा क्षण आपल्या नजरेत साठवून ठेवण्यासाठी वारकरी भाविक आतुर झालेला दिसून येत होता.
विठ्ठल नामाच्या गजरात समस्थ वारकरी भक्ती रसात चिंब भिजले होते. सावळ्या विठ्ठलाचे रुप पाहण्यासाठी आणि त्यांच्या दर्शनासाठी आतुरलेल्या वारकऱ्यांच्या चेहऱ्यावर आनंदही ओसंडून वाहत होता. यावेळी बाजीराव विहीर परिसरात माऊलीच्या दर्शनासाठी भाविकांनी गर्दी केली होती.
