पुणे- विवाहानंतर पत्नी सतत त्रास देत असल्याने तसेच पत्नीसाेबत सासू आणि मेहुणी देखील त्रास देऊन मानसिक छळ करत असल्याने तरुणाने नैराश्यातून गळफास घेऊन आत्महत्या केल्याची घटना विश्रांतवाडी परिसरात घडली आहे. प्रफुल्ल हरिश्चंद्र कदम (वय ३२, रा. सत्यम राजयोग सोसायटी, धानोरी, विश्रांतवाडी) असे आत्महत्या केलेल्या तरुणाचे नाव आहे. याप्रकरणी तरुणाला आत्महत्येस प्रवृत्त केल्याच्या आरोपावरुन पत्नी, सासू, मेहुणीविरुद्ध पोलिसांनी गुन्हा दाखल केला आहे.
याप्रकरणी मयत प्रफुल्ल कदम यांचे वडील हरिश्चंद्र गोविंद कदम (वय ६०) यांनी विश्रांतवाडी पोलीस ठाण्यात सूनेसह इतर आराेपी विराेधात फिर्याद दिली आहे. याबाबत प्रफुल्ल याची पत्नी, सासू, मेहुणी यांच्याविरुद्ध गुन्हा दाखल करण्यात आलेला आहे.
पोलिसांनी दिलेल्या माहितीनुसार, मयत प्रफुल्ल हा एका खासगी कंपनीत काम करत हाेता त्याचा विवाह झाल्यानंतर पत्नी, सासू, मेहुणीने प्रफुल्ल यांना वेळाेवेळी जाणीवपूर्वक त्रास देण्यास सुरुवात केली. ‘तुम्ही आम्हाला फसवले आहे. तू मेला तर मी दुसरा विवाह करुन सुखी राहिल’, असे त्यांनी प्रफुल्ल यांना वारंवार सांगितले होते. पत्नी, सासू, मेहुणीच्या या बाेलण्यामुळे त्यानी धानाेरीतील राहत्या घरी गळफास घेऊन आत्महत्या केली. आत्महत्या करण्यापूर्वी प्रफुल्ल यांनी चिठ्ठी लिहिली होती. चिठ्ठीत पत्नी, सासू, मेहुणीच्या त्रासामुळे आत्महत्या करत असल्याचे प्रफुल्ल यांनी नमूद केले आहे. याबाबत मयताचे वडील हरिश्चंद्र यांनी नुकतीच पोलिसांकडे तक्रार दिली.त्यामुळे आत्महत्येस प्रवृत्त केल्याप्रकरणी आराेपींवर गुन्हा दाखल करण्यात आला. पोलीस उपनिरीक्षक पद्मराज गंपले पुढील तपास करत आहेत.
