पुणे–शिवाजीनगर येथील गंधर्व लॉजमध्ये बेकायदेशीरपणे सुरु असलेल्या जुगार अड्ड्यावर पोलिसांनी छापा घालून जुगार खेळणार्‍या ६ प्रतिष्ठितांना पकडले. त्यांच्याकडून पौंड, डॉलर या परदेशी चलनासह ६ लाख ३७ हजार २९० रुपयांचा ऐवज जप्त केला. त्याचवेळी जुगार खेळण्यासाठी खोली उपलब्ध करुन देणारे हॉटेल मालक शेट्टी व चालक सचिन मेश्राम यांच्यावरही गुन्हा दाखल केला आहे.
गौरव संपत राठोड (वय २९, रा. गंगाधाम मार्केटयार्ड), हरिश फुटरमल सोलंकी (वय ५४, रा. कोर्णाक प्लस, सोपान बाग), रितेश जयंतीलाल ओसवाल (वय ३४, रा. राजलक्ष्मी सोसायटी, मार्केटयार्ड), पराग आनंदराव मुथा (वय ४१, रा. गगनविहार, मार्केटयार्ड) अशी गुन्हा दाखल झालेल्यांची नावे आहेत.
याबाबत पोलीस अंमलदार सचिन चंद्रकांत जाधव यांनी शिवाजीनगर पोलीस ठाण्यात फिर्याद दिली आहे. याबाबत पोलिसांनी दिलेल्या माहितीनुसार, पोलीस अंमलदार सचिन चंद्रकांत जाधव यांना बातमीदारांकडून माहिती मिळाली की, शिवाजीनगर येथील गंधर्व लॉज येथे जुगार चालू आहे. वरिष्ठ पोलीस अधिकार्‍यांच्या आदेशानुसार वरिष्ठ पोलीस निरीक्षक चंद्रशेखर सावंत, पोलीस उपनिरीक्षक अजित बडे, हवालदार चव्हाण, मोहिते, पवार, पोलीस अंमलदार दडस, सांगवे, तायडे यांनी गंधर्व लॉजमधील पहिल्या मजल्यावरील खोलीवर छापा टाकला. तेव्हा तेथे सहा जण पत्ते खेळत होते. गौरव राठोड याला विचारल्याने त्यांनी आम्ही सर्व जण तिर्रट नावाचा तीन पत्ती जुगार पैशांवर खेळत असल्याचे सांगितले.
त्यांच्यासमोर वेगवेगळ्या रंगाच्या प्लॅस्टिकच्या कॉईन होत्या. त्यातील हिरव्या रंगाच्या कॉईनची किंमत २० रुपये, लाल रंगाचे कॉईनची किंमत १०० रुपये व काळ्या रंगाच्या कॉईनची किंमत १ हजार रुपये असल्याचे सांगितले. या सर्वांची झडती घेऊन त्यांचे मोबाईल फोन व जुगाराचे साहित्य असा ६ लाख ३७ हजार ९०० रुपयांचा माल पोलिसांनी जप्त केला आहे. पोलीस उपनिरीक्षक अजित बडे अधिक तपास करीत आहेत.
