मुंबई- सामाजिक कार्यकर्त्या अंजली दमानिया यांनी गुरुवारी मंत्री धनंजय मुंडे यांचा हातात पिस्तुल असणारा एक व्हिडिओ पोस्ट केला आहे. या पोस्टद्वारे त्यांनी हे असले बॉस? असा प्रश्न उपस्थित करत बीडमधील सर्वच शस्त्र परवान्यांची ताबडतोब चौकशी लावण्याची मागणी केली आहे. यामुळे या प्रकरणी धनंजय मुंडे यांच्या अडचणींत आणखी वाढ होण्याची शक्यता व्यक्त केली जात आहे.मस्साजोगचे माजी सरपंच संतोष देशमुख यांची गत 9 डिसेंबर रोजी निर्घृण हत्या करण्यात आली होती. या घटनेचे राज्यभर तीव्र पडसाद उमटलेत. विशेषतः मंत्री धनंजय मुंडे यांचे विश्वासू वाल्मीक कराड यांचे नाव या प्रकरणात आल्यामुळे या प्रकरणाची संवेदनशीलता वाढली आहे. या पार्श्वभूमीवर अंजली दमानिया यांनी बीडमधील कायदा सुव्यवस्थेवर प्रश्नचिन्ह उपस्थित केले आहे.
अंजली दमानिया गुरुवारी 2 व्हिडिओ ट्विट केले. यापैकी एका व्हिडिओत धनंजय मुंडे व त्यांचे विश्वासू वाल्मीक मुंडे कारमध्ये बसल्याचे दिसून येत आहे. या कारचे सारथ्य स्वतः मुंडे करत असून, वाल्मीक कराड त्यांच्या शेजारी बसल्याचे दिसत आहेत. दुसऱ्या व्हिडिओत धनंजय मुंडे यांचा हातात पिस्तुल असल्याचा फोटो व त्यामागे एक गाणे ऐकू येत आहे.अंजली दमानिया आपल्या ट्विटमध्ये धनंजय मुंडे यांच्या या कृतीवर संताप व्यक्त करत म्हणाल्या, हे असले बॉस? इन्स्टाग्रामवर अशी रिल्स दाखवल्यावर नवी पिढी ह्यातून काय प्रेरणा घेणार? कष्ट न करता पिस्तुल दाखवून पैसे कमावणे सोपे असेच त्यांना वाटते. आपला देश असा असणार आहे का? हे देशाबद्दल vision असणार आहे का? ताबडतोब बीड मधील सगळ्या शस्त्र परवान्यांची चौकशी लावा. गरज नसलेले सगळे परवाने रद्द करा, असे त्या म्हणाल्या.
