पुणे – शहरातील पाणीपुरवठ्याबाबत तक्रारी वाढत आहेत. तरी, या समस्येचे गांभीर्य लक्षात घेऊन शासनाने तातडीने लक्ष घालावे, अशी मागणी आमदार सिद्धार्थ शिरोळे यांनी आज (शनिवारी) विधानसभेत औचित्याचा मुद्दा उपस्थित करून केली.
शहरात तसेच माझ्या छत्रपती शिवाजीनगर विधानसभा मतदार संघात पाण्याच्या तक्रारी वाढण्यास सुरूवात झाली आहे. अचानक कमी दाबाने तसेच अपुरे पाणी येत असल्याने नागरिक तक्रारी करत आहेत. मात्र, प्रशासनाकडून याबाबत बोलण्यास नकार दिला जात आहे, असे शिरोळे यांनी सभागृहात सांगितले.
शहर-उपनगरांतून सध्या अचानकपणे पाण्याची मागणी वाढल्याचे सांगण्यात येत आहे. साधारपणे हिवाळ्यात पाण्याची मागणी कमी असते. मात्र, दुसरीकडे मागणी वाढत असल्याचे प्रशासन सांगत आहे. यातून स्पष्ट होते की, शहरात पाणी पुरवठा कमी होत आहे, असे शिरोळे म्हणाले.
पाणीपुरवठ्याची स्थिती गंभीर असून शासनाने पुणे शहरातील तसेच माझ्या छत्रपती शिवाजीनगर विधानसभा मतदार संघातील पाणी पुरवठा सुरळीत होण्यासाठी त्वरित उपाय योजना करणे गरजेचे आहे. शासनाने सदर प्रकरणाकडे गांभीर्याने बघण्याची आवश्यकता आहे, असे आमदार शिरोळे यांनी सांगितले.
