नवी दिल्ली- राष्ट्रवादी काँग्रेसच्या खासदार तथा अजित पवारांच्या पत्नी सुनेत्रा पवार यांना पहिल्यांदा खासदार होणाऱ्यांना मोठा बंगला मिळत नाही एवढा मोठ्ठा दिल्लीत बंगला मिळाला आहे. तोही सोनिया गांधींच्या शेजारी… महाराष्ट्र विधानसभा निवडणुकीतील राष्ट्रवादीच्या यशामुळे हा बंगला देण्यात आल्याची चर्चा राजकीय वर्तुळात रंगली आहे. .सुप्रिया सुळे यांनी लोकसभेच्या निवडणुकीत त्यांचा पराभव करूनही त्यांना राज्यसभेवर घेणे आणि आता सोनिया गांधींच्या शेजारी एवढा मोठ्ठा बंगला देणे याचा याचा संबंध अजित पवारांच्या दिल्लीत वाढलेल्या दबदब्याशीही जोडला जात आहे
टाईम्स ऑफ इंडियाच्या वृत्तानुसार, सुनेत्रा पवार यांना दिल्लीच्या लुटियन्सच्या 11 जनपथवरील टाईप -7 बंगला देण्यात आला आहे. खास गोष्ट म्हणजे हा बंगला राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांच्या 6 जनपथ स्थित टाईप -8 बंगल्याला अगदी चिकटून आहे. शरद पवार तिथे आपल्या कन्या खासदार सुप्रिया सुळे यांच्यासोबत राहतात. सीनिअर पवार हे अजित पवार यांचे चुलते आहेत.
लुटियन्समधील सुनेत्रा पवार यांचा टाईप -7 बंगला सध्या चांगलाच चर्चेत आला आहे. कारण, सुनेत्रा या यंदा प्रथमच खासदार बनल्या आहेत. यासंबंधीच्या वृत्तानुसार, पहिल्यांदा खासदार म्हणून संसदेत पोहोचलेल्या व्यक्तीला दुसऱ्या सर्वोच्च श्रेणीचा बंगला दिला जात नाही. पण सुनेत्रांना तो देण्यात आला. उल्लेखनीय बाब म्हणजे सुनेत्रा पवार यांचा लोकसभा निवडणुकीत खासदार सुप्रिया सुळे यांच्याकडून पराभव पत्करावा लागला होता. त्यानंतर राष्ट्रवादीने त्यांना राज्यसभेवर पाठवले होते. हा घटनानंतर लोकसभा निवडणुकीनंतर काही दिवसांतच घडला होता.
लोकसभा निवडणुकीत राष्ट्रवादी काँग्रेसला केवळ 1 जागा मिळाली होती. पण त्यानंतर झालेल्या विधानसभा निवडणुकीत राष्ट्रवादीला तब्बल 41 जागा मिळाल्या. याऊलट शरद पवारांच्या राष्ट्रवादीला अवघ्या 10 जागांवर समाधान मानावे लागले. या कामगिरीमुळे अजित पवारांची दिल्लीतील ताकद वाढली आहे. यामुळेच सुनेत्रा पवार यांना दिल्लीत मोठा बंगल्याचे वाटप करण्यात आल्याची चर्चा आहे.
उल्लेखनीय बाब म्हणजे सुनेत्रा पवार यांच्या शेजाऱ्यांत शरद पवारच नव्हे तर काँग्रेस नेत्या सोनिया गांधी, भाजपचे अध्यक्ष तथा केंद्रीय आरोग्य मंत्री जे पी नड्डा, माजी राष्ट्रपती रामनाथ कोविंद आदी बड्या नेत्यांचा समावेश आहे.
संजय राऊत यांची बंगल्यावर हरकत-शिवसेनेच्या ठाकरे गटाचे खासदार संजय राऊत यांनी सुनेत्रा पवार यांना मिळालेल्या बंगल्यावर हरकत नोंदवली आहे. ते म्हणाले, मी अनेक वर्षांपासून खासदार आहे. मी पहिल्यांदा खासदार झालो होतो, तेव्हा आम्हाला साधे घर दिले गेले. पण सुनेत्रा पवार यांना टाईप-7 दर्जाचा बंगला देऊन भाजपने अजित पवार यांची सोय केली. कदाचित त्यांना दिल्लीत येता – जाता यावे यासाठी हे केले असावे. भाजप हे मुद्दामहून करते. नेत्यांना कमी लेखण्यासाठी हे कारस्थान केले जाते. दिल्ली ही कपट कारस्थानांची राजधानी आहे. दिल्लीत जितके कारस्थान रचले जाते, तेवढे जगात कुठेही दिसून येत नाही.
