100 सातपुते मोहिते पाटलांचे बुट पुसायला असतात
मुंबई-शंभर शकुनी मेल्यानंतर एक शरद पवार जन्माला आले, अशी जहरी टीका भाजप नेते गोपीचंद पडळकर यांनी केली होती. या टीकेला शरद पवार गटाकडून प्रत्युत्तर देण्यात आले आहे. बारक्या उंदरांच्या सुळसुळाटाने काही फरक पडत नाही. असली बारकी- चिरकी 5 उंदरं पवार साहेब रोज नाश्त्याला खातात, अशा शब्दांत शरद पवार गटाचे आमदार उत्तमराव जानकर यांनी प्रत्युत्तर दिले आहे.
सोलापूर जिल्ह्यातील माळशिरस तालुक्यातील मारकडवाडी गावाची सध्या देशभरात चर्चा सुरू आहे. विधानसभा निवडणुकीच्या निकालानंतर या गावाने मॉक पोलिंगचा निर्णय घेतला होता. रविवारी शरद पवार यांनी या गावात भेट दिली होती. त्यावेळी घेतलेल्या सभेत ग्रामस्थांनी मॉक पोलिंगच्या घेतलेल्या निर्णयाचे कौतुक केले होते. त्यानंतर आज महायुतीच्या नेत्यांनी या गावात सभा घेत विरोधकांवर निशाणा साधला. त्यामुळे सध्या मारकडवाडी हे गाव राजकीय घडामोडींचे केंद्र बनले आहे.
बारक्या उंदरांच्या सुळसुळाटाने काय फरक पडत नाही. असली बारकी- चिरकी 5 उंदरं पवार साहेब रोज नाश्त्याला खातात, अशी टीका उत्तमराव जानकर यांनी गोपीचंद पडळकर आणि सदाभाऊ खोत यांच्यावर केली. त्यांच्या मागे कोण सगळ्यांना माहिती आहे. अशी बारीक उंदरं मारकडवाडीत जाऊन पवारसाहेबांवर टीका करतात. पण कावळ्याच्या शापाने गुरे मरत नाहीत, असेही जानकर म्हणाले. पवार साहेब हे पवार साहेब आहेत. त्यांनी भल्याभल्यांना लोळवले आहे. बॅलेट पेपरवर निवडणूक होत नाही तोपर्यंत मारकडवाडीमधील आंदोलन सुरूच राहील, असे म्हणत उत्तमराव जानकर यांनी सदाभाऊ खोत आणि गोपीचंद पडळकर यांच्या टीकेला उत्तर दिले आहे.
पुढे बोलताना उत्तमराव जानकर यांनी राम सातपुते यांच्यावरही हल्लाबोल केला. 2029 ला भाजपचाच गुलाल उधळणार, असा विश्वास राम सातपुते यांनी मारकडवाडीत बोलताना व्यक्त केला होता. राम सातपुतेंनी माझ्यासोबत यावे. गुलाल उधळायला 2029 कशाला? मी एका महिन्याची संधी देतो. 2029 फार लांब, असे आव्हान जानकर यांनी राम सातपुते यांना दिले. त्याने काय बरळावे, तो त्याचा स्तर आहे. तो वैफल्यग्रस्त आहे. तो मेंटल हॉस्पिटलमध्ये होता. असे 100 राम सातपुते मोहिते पाटलांचे बुट पुसायला असतात, असे म्हणत जानकरांनी राम सातपुतेंवर जोरदार हल्लाबोल केला.
