या सहा जागा होणार रिक्त
कामठी- चंद्रशेखर बावनकुळे भाजप
जत – गोपीचंद पडळकर भाजप
लातूर ग्रामीण – रमेश कराड भाजप
नागपूर मध्य – प्रवीण दटके भाजप
अक्कलकुवा – आमश्या पाडवी शिवसेना
पाथरी – राजेश विटेकर राकाँपा
पुणे- महायुतीकडून ऑक्टोबर महिन्यात १२ पैकी ७ जणांची राज्यपाल नियुक्त विधान परिषद आमदार म्हणून नियुक्ती करण्यात आली होती. यामध्ये भाजप महिला मोर्चाच्या प्रदेशाध्यक्षा चित्रा वाघ, प्रदेश सरचिटणीस विक्रांत पाटील आणि पोहरादेवी येथील धर्मगुरू बाबूसिंग महाराज राठोड यांना संधी देण्यात आली. त्याचबरोबर शिंदे गटाच्या कोट्यातून माजी खासदार हेमंत पाटील आणि प्रवक्त्या डॉ. मनीषा कायंदे तर अजित पवार गटाकडून पंकज भुजबळ आणि इद्रिस नाईकवडी यांची वर्णी लावण्यात आली आहे.तेव्हा ५ जागा भरण्यात आल्या नाहीत त्या अजूनही रिक्तच आहेत . त्यानंतर आता पुन्हा आणखी सहा जागा रिक्त होत आहेत . या जागांवर सहा जणांना विधान परिषदेवर पाठवण्यात येणार आहे.यामध्ये आता एकूण रिक्त जागांमध्ये पुण्यातील कोणाकोणाची नियुक्ती होणार आहे याकडे लक्ष लागले असून दीपक मानकर, श्रीनाथ भिमाले यांच्यासह ,माजी खासदार संजय काकडे यांच्या सहमतीने एखाद्याला आमदारकी देण्याची अपेक्षा पुण्यातून केली जाणार आहे. लोकसभा निवडणुकीमध्ये मुरलीधर मोहोळ यांना सर्वाधिक मते राष्ट्रवादी काँग्रेस पक्षाच्या कार्यकर्त्यांनी मिळवून दिली त्यानंतर आता कसब्याचा बालेकिल्ला देखील पुन्हा हस्तगत करून देण्यात मानकर यांचा सिंहाचा वाटा मानला जातो. विधानसभेच्या निवडणुकीपूर्वी उपमुख्यमंत्री फडणवीस यांनी संजय काकडे यांच्या निवास स्थानी जाऊन भेट देऊन चर्चा केली होती . तर वडगाव शेरीचे माजी आमदार मुळीक यांनाही आश्वासन दिले होते .
विधानसभा निवडणुकीत महायुतीला घवघवीत यश मिळाले आहे. या निकालानंतर विधान परिषदेवर असलेल्या सहा आमदारांचाही विजय झाला आहे. त्यामुळे विधान परिषदेच्या सहा जागा रिक्त झाल्या आहेत. विधान परिषदेच्या रिक्त झालेल्या सहा जागांवर नाराजांना संधी मिळणार आहे. त्यामुळे आता महायुतीतील सहा जणांना विधान परिषदेची लॉटरी लागणार असून, सत्ता स्थापनेनंतर विधान परिषदेवर वर्णी लागण्यासाठी नेत्यांमध्ये लॉबिंग होण्याची शक्यता आहे.
भाजपने चंद्रशेखर बावनकुळे, गोपीचंद पडळकर, रमेश कराड आणि प्रवीण दटके या विधान परिषदेतील ४ आमदारांना निवडणुकीच्या मैदानात उतरवले होते. हे चारही आमदार विधानसभेवर निवडून आले आहेत. भाजपच्या कोट्यातील चार जागा रिक्त झाल्या आहेत, तर दुसरीकडे शिवसेनेकडून आमश्या पाडवी यांची ही विधानसभेवर वर्णी लागली आहे. त्यामुळे शिवसेनेची विधान परिषदेतील एक जागा रिक्त झाली आहे. तसेच अजित पवार यांच्या राष्ट्रवादीचे विधान परिषदेचे आमदार राजेश विटेकर हे देखील विधानसभा निवडणुकीत विजयी झाले आहेत. त्यामुळे राष्ट्रवादी अजित पवार गटाची जागा रिक्त झाली आहे.
