राहुरी -कोणताही पक्ष उभा करण्यासाठी अक्कल लागते, पण तो फोडण्यासाठी काहीच अक्कल लागत नाही, अशा तिखट शब्दांत राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी भाजप नेते तथा उपमुख्यमंत्री अजित पवार यांच्यावर निशाणा साधला आहे.
शरद पवार यांची आज अहिल्यानगर जिल्ह्यातील राहुरी येथे प्रचारसभा झाली. त्यात शरद पवार यांनी राज्यातील फोडाफोडीच्या मु्द्यावरून देवेंद्र फडणवीस यांच्यावर सडकून टीका केली. ते म्हणाले, मुख्यमंत्री एकनाथ शिंदे यांनी 30-40 आमदार गोळा केले आणि गुवाहाटीला जाऊन बसले. त्यांनी उद्धव ठाकरे यांचे सरकार पाडले. लोकांना त्यांची भूमिका पटली नाही. हे शिंदे स्वतः देवेंद्र फडणवीस यांच्या मंत्रिमंडळात मंत्री होते. उद्धव ठाकरे यांच्याही सरकारमध्ये ते होते. त्यानंतरही त्यांनी बंडखोरी केली.
एखादा पक्ष फोडून सत्ता मिळवणे ही लोकशाही आहे का? देवेंद्र फडणवीस यांनी स्वतः आपण ही फोडाफोडी केल्याचे मान्य केले आहे. कोणताही पक्ष उभा करण्यासाठी मोठी अक्कल लागते. पण तो फोडण्यासाठी काहीच अक्कल लागत नाही हे त्यांनी लक्षात घ्यावे.
लोकसभा निवडणुकीच्या प्रचारावेळी मी राहुरीला आलो होतो. त्यानंतर तुम्ही आपला उमेदवार निवडून दिला. त्याबद्दल तुमचे आभार. मागच्या लोकसभेला काँग्रेसचा 1 व आमचे 4 खासदार होते. पण संविधान संकटात सापडल्यामुळे तुम्ही यावेळी आमचे 31 खासदार निवडून दिले. आता राज्यात भाजप व आमच्यातल्या फुटून गेलेल्या काही लोकांचे राज्य आहे, असे शरद पवार म्हणाले.
शरद पवार यांनी यावेळी भाजपला सत्तेत बसण्याचा कोणताही अधिकार नसल्याचेही ठणकावून सांगितले. ते म्हणाले, लोकसभा निवडणुकीत आम्ही सत्ताधारी एनडीएविरोधात इंडिया आघाडी स्थापन केली. कारण, मोदींनी 400 पारचा नारा देत देशाचे संविधान बदलण्याचा डाव रचला होता. पण तो डाव महाराष्ट्रातील जनतेने हाणून पाडला. त्यांनी आम्हाला राज्यातील लोकसभेच्या 48 पैकी सर्वाधिक 31 जागा दिल्या. यामुळे सत्ताधारी महायुतीची चिंता वाढली. यावर उपाय म्हणून त्यांनी नवनवीन योजना आणल्या. विधानसभा निवडणुकीच्या तोंडावर त्यांची अंमलबजावणी केली. पण आज महाराष्ट्रात महिला सुरक्षित नाहीत. अनेक बहिणी बेपत्ता आहेत. त्यानंतरही तुम्ही लाडकी बहीण म्हणता?
महाराष्ट्रात मागील वर्षभरात 1100 हून अधिक शेतकऱ्यांनी आत्महत्या केल्या. शेतकऱ्यांच्या हाती आलेले पीक वाया गेले. यामुळे त्यांना कर्जाची परतफेड करता आली नाही. आता त्यांच्या शेतमालालाही रास्त भाव मिळत नाही. त्यामुळे ते घटाघटा विष पिऊन आत्महत्या करत आहेत. त्यामुळे भाजपला सत्तेत बसण्याचा कोणताही अधिकार नाही, असे ते म्हणाले.
