धुळे -राहुल गांधी यांनी कान उघडे ठेवून ऐकवे, की तुमची चौथी पिढी आली तरी देखील मुस्लिम समाजाला आरक्षण देता येणार नाही. राहुल गांधीच नाही तर इंदिरा गांधी देखील स्वर्गातून परत आल्या तरी 370 कलम परत आणू शकत नसल्याचे केंद्रीय गृहमंत्री अमित शहा यांनी म्हटले आहे.
धुळे जिल्ह्यातील जाहीर सभेत अमित शहा यांनी उद्धव ठाकरे, राहुल गांधी आणि काँग्रेस पक्षावर जोरदार टीका केली. राज्यातील महाविकास आघाडी केवळ तुष्टीकरण करत असल्याचा आरोप त्यांनी केला. सत्ता मिळवण्यासाठी उद्धव ठाकरे हे बाळासाहेब ठाकरेंची सर्व तत्त्वे विसरले असल्याचा आरोप त्यांनी केला. औरंगाबादच्या नामांतरला विरोध करणारे, राम मंदिराच्या उभारणीला विरोध करणारे, कलम 370 हटवण्यास विरोध करणारे, पाकिस्तानविरुद्धच्या सर्जिकल स्ट्राईकवर आक्षेप घेणाऱ्या औरंगजेब फॅन क्लबसोबत उद्धव ठाकरे असल्याचा आरोप त्यांनी केला. तर दुसरीकडे आम्ही छत्रपती शिवाजी महाराज आणि सावरकर यांच्या तत्त्वांनुसार काम करणारे असल्याचे शहा यांनी म्हटले आहे.
राहुल गांधी यांनी कान उघडे ठेवून ऐकवे, की तुमची चौथी पिढी आली तरी देखील मुस्लिम समाजाला आरक्षण देता येणार नाही. मुस्लिम समाजाला आरक्षण द्यायचे असेल तर एससी, एसटी, ओबीसी आणि इतर समाजातील आरक्षण कमी करून द्यावे लागणार आहे. मात्र ते होणे शक्य नसल्याचे अमित शहा यांनी म्हटले आहे. देशातील सर्व उलेमांनी काँग्रेस पक्षाच्या अध्यक्षांची भेट घेतली असून त्यांच्याकडे आरक्षणाची मागणी केली असल्याचे अमित शहा यांनी म्हटले आहे. या मुद्द्यावरून अमित शहा यांनी राहुल गांधी यांच्यावर देखील जोरदार हल्ला चढवला.
जम्मू-काश्मीरमध्ये 370 कलम वापस आणण्याचा प्रस्ताव काँग्रेसने केला आहे. मात्र राहुल गांधीच नाही तर इंदिरा गांधी देखील स्वर्गातून परत आल्या तरी 370 कलम परत आणू शकत नसल्याचे अमित शहा यांनी म्हटले आहे. कलम 370 आता हटवण्यात आले असल्याचे अमित शहा यांनी म्हटले आहे. सुशील कुमार शिंदे गृहमंत्री असताना कश्मीरमधील लाल चौकात जायला भीती वाटत असल्याचे म्हणाले होते. मात्र आता तुम्ही गृहमंत्री नाही तर मी गृहमंत्री आहे. तुमच्या नातवांना घेऊन काश्मीरला जा, तुमच्या केसांना देखील धक्का लागणार नसल्याचे आव्हान यावेळी अमित शहा यांनी सुशीलकुमार शिंदे यांना दिले आहे.
या वेळी अमित शहा म्हणाले की, उद्धवबाबू, तुम्ही कोणासोबत आहात? आज तुम्ही औरंगाबादच्या नामांतराला विरोध करणारे, राम मंदिराच्या उभारणीला विरोध करणारे, कलम 370 रद्द करण्याला विरोध करणारे आणि पाकिस्तानविरुद्धच्या सर्जिकल स्ट्राईकवर आक्षेप घेणाऱ्यांच्या सोबत आहात. राज्यातील महाविकास आघाडी म्हणजे औरंगजेब फॅन क्लब असल्याचे अमित शहा यांनी म्हटले आहे.हरियाणा निवडणुकीत देखील काँग्रेस पक्ष सत्ता स्थापनेचा दावा करत होता. मात्र, निवडणुकीचा निकाल आला आणि त्या ठिकाणी काँग्रेसचा सुपडा साफ झाला असल्याचा दावा केंद्रीय गृहमंत्री अमित शहा यांनी केला आहे. महाराष्ट्रात देखील 23 तारखेचा निकाल आल्यानंतर काँग्रेसचा सुपडा साफ झालेला असेल. राज्यात महायुतीचेच सरकार स्थापन होईल, असा दावा अमित शहा यांनी केला आहे.
राज्यातील सर्व लाडक्या बहिणीला कमळच्या फुलासोबत आणि भारतीय जनता पक्षासोबत असल्याचे अमित शहा यांनी म्हटले आहे. आमच्या बहिणींसाठी एकनाथ शिंदे आणि देवेंद्र फडणवीस काम करत आहेत. मात्र याला सुप्रिया सुळे विरोध करत असल्याचे अमित शहा यांनी म्हटले आहे. मात्र त्यांची चिंता तुम्ही करू नका, महायुतीचे सरकार स्थापन करा आणि लाडक्या बहिणीच्या खात्यामध्ये 2100 रुपये जमा होत राहतील, असे आश्वासन देखील अमित शहा यांनी दिले आहे.
राज्याच्या इतिहासात आजपर्यंत कधीही झाले नाही, अशा सर्वात मोठ्या मताधिक्याने महायुती सरकार स्थापन करेल, असा दावा अमित शहा यांनी केला. आघाडीतील नेते सर्व समुदायाचा विरोध करतात. रामगिरी महाराजांच्या विरोधात इथे वक्तव्य केले जात आहे. सिंदखेड मध्ये दंगली घडवल्या जात आहेत. देश आणि महाराष्ट्रासाठी योग्य नसणाऱ्या लोकांचा सपोर्ट महाविकास आघाडी करत असल्याचा आरोप अमित शहा यांनी केला. काँग्रेस पक्ष हा एसटी-एससी आणि विशेष करून मागासवर्गीय नागरिकांचा विरोध करत असल्याचे अमित शहा यांनी म्हटले आहे.
