पुणे- मी आबांची लेक आहे असे विधान करत गेल्या विधानसभा निवडणुकीत आबा बागुलांना माघार घ्यायला लावणाऱ्या राष्ट्रवादीच्या उमेदवार अश्विनी कदम आणि भाजपच्या विद्यमान आमदार माधुरी मिसाळ या दोन्ही मातब्बरांना आता यावेळी पित्यासमान वयाच्या आबा बागुल यांच्याशीच लढत द्यावी लागणार असल्याचे स्पष्ट झाले आहे.सचिन तावरे हे देखील रिंगणात आहेत मात्र त्यांनी आयत्यावेळी अर्ज माघारी घेण्यास उशीर झाल्याने आपण रिंगणात असलो तरी अश्विनी कदम यांना पाठींबा दिला आहे.त्यामुळे त्यांची उमेदवारी हि गौण मानली जाणार आहे.
राष्ट्रवादीचे अंकुश काकडे यांनी म्हटले आहे कि,’ पर्वती विधानसभा मतदारसंघातील उमेदवार श्री सचिन तावरे यांनी सौ. सुप्रिया सुळे यांच्या विनंतीला मान देऊन अर्ज मागे घेण्याचा निर्णय घेतला,परंतु वेळेमध्ये ते निवडणूक निर्णय अधिकाऱ्यापर्यंत पोहोचू शकले नाहीत.३ मिनिटांचा उशीर झाला, त्यामुळे त्यांचा अर्ज माघार होऊ शकला नाही, पण श्री सचिन तावरे यांचा महाविकास आघाडीच्या उमेदवार सौ अश्विनी कदम यांना आहे.
दरम्यान भाजपच्या माधुरी मिसाळ यांनी आजपर्यंत प्रचाराला प्रारंभ केला नव्हता तो आज दुपारी ४ वाजता त्या प्रचाराचा प्रारंभ करत आहेत.
आपल्या प्रभागात केलेली लौकिकप्राप्त विकास कामे ३५ वर्षे नगरसेवक पदावरून केलेला कारभार आणि जनतेशी साधलेली जवळीक यामुळे आबा बागुलांचा या मतदार संघावर प्रभाव निश्चित असणार आहे. त्यांच्यावर वारंवार विधानसभेची उमेदवारी देण्याबत पक्षाने आणि विविध नेत्यांनी केलेले डावलण्याचे राजकारण यामुळे आबांच्या बाबत सहानुभूती आहे आता आपल्या राजकीय कारकिर्दीला पणाला लाऊन आबा बागुल पर्वती मतदार संघाच्या रिंगणात उतरले आहेत.
