पुणे:भाजप नेते, माजी खासदार संजय काकडे यांच्या काकडे हाऊस वर दुपारी जाऊन उपमुख्यमंत्री देवेंद्र फडणवीस यांनी काकडे परिवाराची भेट घेतली. काकडे हे शरद पवारांच्या राष्ट्रवादीच्या वाटेवर अशा चर्चेच्या बातम्यांच्या पार्श्वभूमीवर उपमुख्यमंत्री देवेंद्र फडणवीस यांनी दिलेल्या या भेटीला राजकीय महत्व दिले जात आहे , यावेळी उषा काकडे ,आणि संजय काकडे यांच्याशी त्यांनी सुमारे 45 मिनिटे चर्चा केली.
फडणवीस यांनी या भेटीची माहिती माध्यमातून फोटो सह प्रसिद्ध केली आहे,भाजपा महाराष्ट्राचे उपाध्यक्ष संजय काकडे यांच्या पुणे येथील निवासस्थानी आज मी सदिच्छा भेट दिली. यावेळी काकडे परिवाराने केलेल्या स्वागतासाठी मी आभारी आहे! असे फडणवीस यांनी म्हंटले आहे.
संजय काकडे कसबा विधानसभा मतदारसंघातून लढण्यासाठी इच्छुक होते. संजय काकडे राष्ट्रवादी काँग्रेस शरदचंद्र पवार पक्षा सोबत जाणार असल्याच्या चर्चा होत्या. गेल्या अनेक दिवसापासून संजय काकडे भाजपमध्ये नाराज आहेत अशा देखील बातम्या येत होत्या. या पार्श्वभूमीवर देवेंद्र फडणवीस यांनी आज त्यांच्या निवासस्थानी जात संजय काकडे यांच्याशी चर्चा केली आहे. आता दोन्ही नेते कोणती भूमिका घेणार याकडे सर्वांचे लक्ष आहे.
