पुणे- होस्टेल मध्ये राहणारे,किंवा पेईंगगेस्ट म्हणून राहणारे श्रीमंत नसतात ,अनेक विद्यार्थी आणि नौकरदार जे पुण्यात घर घेऊ शकत नाहीत , लॉजेस मध्ये राहू शकत नाहीत असे सामान्य लोक वसतिगृहंचा आसरा घेतात , पेईंगगेस्ट म्हणून राहतात , अशा मिळकतींना दुप्पट मिळकत कर लावण्याची महापालिका प्रशासनाने घोषणा केली आहे. असा दुप्पट कर लावला तर तो मालक तेथे राहणाऱ्या सामान्य वर्गाच्या मासिक भाड्यात वाढ करूनच वसूल करणार आहे, अशा सामान्य माणसाच्या सोयीसुविधांना सवलती देण्याऐवजी दुप्पट कर लावून वसुलीचा इरादा करणे म्हणजे सामान्यांचा आर्थिक छळवाद आरंभणे होईल असा आरोप करत महापालिकेने आपला इरादा त्वरित बदलावा अन्यथा आप ला उग्र आंदोलन हातही घ्यावे लागेल असा इशारा आम आदमी पार्टीने दिला आहे. आप चे राज्य प्रवक्ते मुकुंद किर्दत यांनी म्हंटले आहे कि,’पुण्यात शिक्षण अथवा नोकरीसाठी येणाऱ्या विद्यार्थ्यांसाठी निवासी मिळकतीत वसतिगृह, कॉट बेसिस, पेईंगगेस्ट सुविधा पुरविणाऱ्यांकडून व्यावसायिक दराने मिळकतकर आकारण्यात यावा, असा प्रस्ताव महापालिका प्रशासनाने तयार केला आहे. हा धोरणात्मक प्रस्ताव स्थायी समितीला सादर करण्यात आला आहे.
हा प्रस्ताव म्हणजे पुण्यात शिक्षण, परीक्षा आणि नोकरी साठी येणाऱ्या लाखो बॅचलर मुलामुलींना मोठा आर्थिक फटका ठरेल. पुणे शिक्षणाचे माहेरघर असून सरकारी परीक्षा तयारीसाठी, शिकण्यासाठी लाखो मुले मुली वर्षभर तर काही तात्पुरत्या काळासाठी कॉट बेसिस, पेईंग गेस्ट, भाडेकरू अश्या स्वरूपात राहतात. त्यांची आर्थिक स्थिती अनुरूप घर घेतात. मुलींच्या बाबतीत सुरक्षेचा प्रश्न म्हणूनही मुली एकत्र राहतात. खानावळ खर्च वाचवण्यासाठीसुद्धा पेईंग गेस्ट म्हणून राहतात. तर अनेक जण रोजगार कमविण्यासाठी शहरात एकटे राहतात. यात मजुरांची संख्या सुद्धा लक्षणीय आहे.
हे सर्वजण मुख्यत्वे अर्थिक दृष्ट्या मध्यम व कनिष्ठ वर्गातील असतात. त्या घराना बिगर निवासी, व्यवसायिक आकारणी केल्यास घरमालक भाडेवाढ करतील व तो बोजा विद्यार्थ्यावर पडेल. बऱ्याचदा कॉलेज ला सुट्ट्या असताना भाडे मिळत नाही. ही सर्व वस्तुस्थिती पाहता या मिळकती बिगर निवासी ठरवून त्यांना व्यवसायिक ठरवणे अयोग्य आहे असे आप चे राज्य प्रवक्ते मुकुंद किर्दत यांनी म्हंटले आहे.
मनपा मध्ये लोकप्रतिनिधी नसताना असा निर्णय प्रशासनाने घेवू नये. तसेच मोठे थकबाकीदार, सवलतीचा फायदा घेणारे मोठे व्यावसायिक, नोंद न झालेले मिळकतदार, सर्व्हिस अपार्टमेंट देणारे हॉटेल व्यवसायिक, मोठी व्यवसायिक वसतिगृह याबाबत कार्यवाही न करता छोट्या मिळकतदारास वेठीस धरू नये अशी मागणी सुदर्शन जगदाळे, अध्यक्ष आप पुणे यांनी केली आहे.
