मुंबई- महाविकास आघाडीचे जागावाटप निकाली निघाल्याच्या दावा करणाऱ्या काँग्रेसने आज पुन्हा एकदा शिवसेना उद्धव बाळासाहेब ठाकरे पक्षाशी जागा बदलावर चर्चा केली. ज्येष्ठ काँग्रेस नेते बाळासाहेब थोरात यांनी आज मातोश्रीवर जाऊन जागावाटपाविषयी काँग्रेस अध्यक्ष मल्लिकार्जुन खरगे यांचा निरोप त्यांना कळवला. त्यानंतर पत्रकारांशी बोलताना थोरात यांनी याची पुष्टी केली. यावेळी त्यांनी आपल्या मुलीविषयी भाजप नेत्याने केलेल्या विधानाचा कडक शब्दांत निषेध केला.
बाळासाहेब थोरात शनिवारी दुपारी उद्धव ठाकरेंची भेट घेतल्यानंतर पत्रकारांशी बोलताना म्हणाले, माझी उद्धव ठाकरेंसोबत चर्चा झाली. काँग्रेस अध्यक्ष मल्लिकार्जुन खरगे व महाराष्ट्र प्रभारी रमेश चेन्नीथला यांनी माझ्यावर उद्धव ठाकरे व शरद पवारांची भेट घेऊन त्यांच्याशी चर्चा करण्याची जबाबदारी सोपवली होती. काही जागांमध्ये बदल होऊ शकतो का? हा विचार या चर्चेत होता. त्या दृष्टिकोनातून आमच्यात चर्चा झाली.
विशेषतः काही विषय असे असतात, जे प्रत्यक्ष भेटून बोलणे गरजेचे असते. आजच्या बैठकीत काय झाले ते मी खरगे व चेन्नीथला यांना सांगणार आहे.
बाळासाहेब थोरात पुढे म्हणाले, महाविकास आघाडी म्हणून आम्हाला काही कार्यक्रम घ्यायचे आहेत. राहुल गांधी, उद्धव ठाकरे यांना सोबत घेऊन काही कार्यक्रम करायचे आहेत. या मुद्यावरही माझी उद्धव ठाकरे यांच्याशी चर्चा झाली. पत्रकारांनी यावेळी उमेदवारी अर्ज भरण्यास केवळ 2 दिवस शिल्लक असल्याची बाब त्यांच्या निदर्शनास आणून दिली असता त्यांनी अशा गोष्टी शेवटच्या क्षणापर्यंत चालत असल्याचे स्पष्ट केले.
ते म्हणाले, जागावाटपाच्या चर्चेसारख्या काही गोष्टी शेवटच्या क्षणापर्यंत चालत असतात. आम्ही मैत्रीपूर्ण लढती कोणत्याही स्थितीत करणार नाही. महाविकास आघाडी म्हणूनच आमचा अधिकाधिक जागा जिंकण्याचा प्रयत्न असेल. आम्ही 180 हून अधिक जागा जिंकण्याचे उद्दीष्ट ठेवले आहे. महाष्ट्रात आमचे सरकार स्थापन करण्याचा आमचा निर्धार आहे.
