मुंबई -आम आदमी पक्षाचे संयोजक अरविंद केजरीवाल विधानसभा निवडणुकीत महाविकास आघाडीचा प्रचार करणार असल्याची माहिती आहे. केजरीवाल महाविकास आघाडीतील शिवसेना उद्धव बाळासाहेब ठाकरे, राष्ट्रवादी काँग्रेस शरदचंद्र पवार तसेच इतर घटक पक्षांचा प्रचार करणार आहेत. मात्र, ते काँग्रेसचा प्रचार करणार नसल्याचे सांगण्यात येत आहे. अरविंद केजरीवाल यांची राज्यात विभागवार सभा होणार असल्याची देखील माहिती आहे.
महाराष्ट्रात आम आदमी पक्षाचे संघटन काहीच भागात असून त्या मतदानाचा फायदा महायुतीला होऊ द्यायचा नाही, याची खबरदारी महाविकास आघाडीने घेतली आहे. शरद पवार आणि उद्धव ठाकरे यांच्याकडून अरविंद केजरीवाल यांना प्रचाराचे निमंत्रण देण्यात आल्याची सूत्रांची माहिती आहे.
कथित लिकर पॉलिसी भ्रष्टाचार प्रकरणार केजरीवाल यांना तुरुंगात जावे लागले होते. याच दरम्यान त्यांना दिल्लीचे मुख्यमंत्रीपदी गमवावे लागले. त्यामुळे केजरीवाल हे भाजपविरोधात अधिक आक्रमक झाले आहेत. त्यांच्या याच आक्रमकतेचा महाविकास आघाडीला फायदा करुन घेण्याचे मविआने ठरवले असल्याची माहिती आहे.
अरविंद केजरीवाल विधानसभा निवडणुकीत मुंबई, पुणे, नागपूर शहर यांसह विदर्भ, मराठवाडा आणि पश्चिम महाराष्ट्रामध्ये प्रचार करणार असल्याचे सूत्रांकडून सांगण्यात येत आहे. दरम्यान, केजरीवाल हे महाराष्ट्रासह झारखंडमध्ये सुद्धा भाजपविरोधात प्रचार करणार आहेत.दरम्यान, महाराष्ट्रात विधानसभा निवडणूक लढणार नसल्याचे आम आदमी पक्षाने याआधीच जाहीर केले होते. विरोधी पक्षांच्या मतांची विभागणी टाळण्यासाठी हा निर्णय घेण्यात आला होता. आम आदमी पक्षाने हरियाणा विधानसभा निवडणूक स्वबळावर लढली होती. त्याचा थेट फटका काँग्रेसला बसून भाजपचा मोठा फायदा झाला होता. याचे विरोधकांच्या इंडिया आघाडीत तीव्र पडसाद उमटले होते. त्यामुळे आपने महाराष्ट्र व झारखंड विधानसभा निवडणुकीत सावध भूमिका घेत या दोन्ही राज्यांतील निवडणूक न लढवण्याचा निर्णय घेतला. तसेच महाराष्ट्र आणि झारखंड या दोन्ही राज्यांच्या निवडणुकीत आम आदमी पक्ष इंडिया आघाडीला पाठिंबा देईल, असेही सांगण्यात आले होते. त्यानुसार आता अरविंद केजरीवाल महाराष्ट्रात महाविकास आघाडीचा प्रचार करणार असल्याचे सूत्रांनी सांगितले आहे.
