मुंबई/पुणे -जगभरात विमानसेवेचा विस्तार वाढविण्यासाठी एअर इंडियाने नवा पुढाकार घेतला आहे. देशांतर्गत सेवेच्या बळकटीकरणासह आंतरराष्ट्रीय विमानसेवा वाढविण्यासाठी एअर इंडियाने आता सिंगापूर एअरलाइन्सशी हातमिळवणी केली आहे. यानिमित्ताने देशातील ११ शहरे तर आंतरराष्ट्रीय ४० शहरे जोडली जाणार आहे. दोन्ही एअरलाइन्सच्या वतीने या संदर्भात नुकताच दिल्ली येथे करार झाला. एअर इंडियाचे चीफ कमर्शिअल अधिकारी श्री. निपुण अग्रवाल आणि सिंगापूर एअर लाइन्सचे चीफ कमर्शिअल अधिकारी श्री. ली लीक हसीन यांनी कोडशेअर करारावर स्वाक्षरी केली. तब्बल चौदा वर्षांनंतर पहिल्यांदाच दोन्ही एअरलाइन्सने विमानसेवा विस्तारासाठी हातमिळवणी केली. या करारामुळे केवळ भारत आणि सिंगापूर देशातील शहरेच नव्हे, तर इतर देशांतही पर्यटकांना प्रवासाचा मार्ग सुकर होणार आहे.
कोडशेअर सेवेच्या निमित्ताने करारावर स्वाक्षरी करणा-या दोन विमान कंपन्या एकमेकांच्या तिकिटाची विक्री करतात. हा करार विमानसेवेचा विस्तार वाढविण्यासाठी महत्त्वाचा मानला जातो. या निमित्ताने विमान कंपन्यांना विविध ठिकाणी उड्डाण करता येते, शिवाय तिकीट विक्रीतील वाटा उचलता येतो. कंपनीच्या आर्थिक स्थैर्यासाठी, तसेच पर्यटनाच्या वेगवेगळ्या संधी उपलब्ध करण्यासठी कोअरशेड करार फार महत्त्वाचा मानला जातो.
येत्या २७ ऑक्टोबरपासून एअर इंडिया आणि सिंगापूर एअरलाइन्समध्ये कोडशेअर सेवा उपलब्ध होईल. भारतात बंगळुरू आणि चेन्नई, तर सिंगापूर येथे ही सेवा सुरू होईल. या शहरांमधील एकमेकांच्या विमानसेवेची तिकिटे विकली जातील. कालांतराने साप्ताहिक कोडशेअर सेवा १४ वरून ५६वर वाढविली जाईल.
सिंगापूर एअरलाइन्स एअर इंडियाच्या दिल्ली आणि अमृतसर, बंगळुरू, कोइंबतूर, लखनऊ आणि वाराणसीच्या दरम्यान, तसेच मुंबई, अहमदाबाद, अमृतसर, बंगळुरू, कोइंबतूर, गोवा, जयपूर, कोलकाता, लखनऊ, तिरुअनंतपूरम, तसेच कोलकाता आणि गुवाहटीच्या दरम्यान देशांतर्गत उड्डाणांच्या तिकीट विक्रीत सहभाग घेईल.
दुसरीकडे एअर इंडियाचे ग्राहक सिंगापूर एअरलाइन्सच्या २९ शहरांना जोडले जातील. यात ऑस्ट्रेलिया देशातील अॅडलेड, ब्रिस्बेन, केर्न्स, डार्विन, मेलबर्न, पर्थ आणि सिडनी ब्रुनेई देशातील बंदर, सेरी, बेगवान, कंबोडिया देशातील नोम, पेन्ह, सीमरीप, इंडोनेशियातील डेनपासार, जकार्ता, मेदान आणि सुराबाया, जपानमधील फुकुओका, नागोस ओसाका, टोकिया-हनेडा आणि टोकिया देशांचा समावेश आहे, तसेच दक्षिण कोरियातील बुसान आणि सोल, मलेशियातील क्वालालंपूर आणि पेनांग, न्यूझीलंडमधील ऑकलंड फिलिपिन्समधील सेबू आणि मनिला व व्हिएतनामधील दानांग, हनोई आणि हो ची मिन्स शहरांमध्येही कोअरशेअर सेवा उपलब्ध असेल. यामध्ये अगोदरपासूनच सुरू असलेल्या क्वालालंपूर सेवेचाही समावेश करण्यात आला आहे.
देशातील बंगळुरू, मुंबई आणि दिल्ली या शहरांतून सिंगापूर एअरलाइन्सचे ग्राहक एअरइंडियाच्या विमानांची सेवा उपलब्ध असलेल्या युरोप, आफ्रिका, तसेच इतर देशांमध्ये प्रवास करू शकतील. एअर इंडियाची विमानसेवा उपलब्ध असलेल्या डेन्मार्क येथील कोपनहेगन, फ्रान्समधील पॅरिस, जर्मनीतील फ्रॅंकफर्ट, इटलीतील मिलान, केनियातील नैरोबी, नेदरलॅँण्डमधील अॅमस्टरडॅम, सौदी अरेबियातील जेद्दाह आणि रियाध, श्रीलंकेतील कोलंबो, तसेच युनायटेड किंगडममधील बर्मिंगहॅम, लंडन-गॅटविक व लंडन-हिथ्रो शहरात सिंगापूर एअरलाइन्सच्या ग्राहकांना एअरइंडियाच्या विमानांतून प्रवास करता येईल.
या देशांमध्ये कोअरशेड सेवेचे जाळे विणत असताना, दोन्ही कंपन्या वेगवेगळे देश आणि शहरही विमानसेवेत समाविष्ट करण्यासाठी प्रयत्नशील आहेत. दोन्ही कंपन्या आपापल्या बुकिंगसेवेचा दर्जा वृद्धिंगत करत कोअरशेड सेवा पुरविण्यास सज्ज झाल्या आहेत. या सेवा आवश्यक नियमांचे पालन करून काटोकोरपणे अवलंबल्या जात आहेत.
एअर इंडियाचे मुख्य व्यावसायिक अधिकारी निपुण अग्रवाल म्हणाले की, एअर इंडिया कंपनीच्या वतीने ग्राहकांना विमानसेवेचे अधिकाधिक पर्याय, तसेच जागतिक पातळीवर पर्यटनाचे विस्तारित जाळे तयार करण्यासाठी प्रयत्न सुरू आहेत. हा उद्देश साधण्यासाठी पूर्वीपासूनच आम्ही सिंगापूर एअरलाइन्ससोबत भागीदारी केली होती. नव्या कोअरशेअर कराराच्या निमित्ताने आता नवीन देशांना आम्ही जोडले जाऊ. दक्षिण मध्य आशिया, ऑस्ट्रेलिया आणि इतर महत्त्वाच्या देशांमध्ये आम्हांला ग्राहकांना विमानसेवा उपलब्ध करता येईल. आम्ही सिंगापूर एअरलाइन्सच्या ग्राहकांना देशातील आमची विमानसेवा उपलब्ध असलेल्या युरोप, आफ्रिका आणि इतर देशांमध्ये पर्यटनाच्या संधी उपलब्ध होतील. ही सेवा पुरविण्यास आम्ही उत्सुक आहोत.’’
