पुणे- यापूर्वी हवालाची ५ कोटीची रक्कम घेऊन मुंबईतून निघालेल्या एका मोटारीवर कराड -सातारा जवळ दरोडा टाकून पळविलेल्या ५ कोटीच्या रकमेचा तपास लागतो ना लागतो तोच आता पुणे बंगळूर राष्ट्रीय महामार्गावर पुणे ग्रामीण पोलिसांनी खेड-शिवापूर टोलनाक्यावर नाकाबंदी दरम्यान तब्बल पाच कोटी कॅश असलेली इनोव्हा क्रिस्टा पकडली आहे. या घटनेमुळे एकच खळबळ उडाली आहे. यावर आता शिवसेना ठाकरे गटाचे खासदार संजय राऊत यांनी हल्लाबोल केला आहे. संजय राऊत यांनी थेट शिंदे गटाचे आमदार शहाजी बापू पाटील यांच्यावर निशाणा सहडला आहे.
संजय राऊत यांनी एक्स या समाज माध्यमावर जोरदार टीका केली आहे. संजय राऊत म्हणाले, मिंधे टोळीतील एका आमदाराच्या गाडीत खेड शिवापूर टोल नाक्यावर 5 कोटी सापडले. हे आमदार कोण? काय गाडी.. काय डोंगर.. मिंधे यांनी निवडणुकीसाठी प्रत्येक उमेदवारास 75 कोटी पाठवले. 15 कोटींचा हा पहिला हप्ता! काय बापू किती हे खोके? अशा शब्दात संजय राऊत यांनी हल्लाबोल केला आहे.
पुणे -सातारा महामार्गावरील खेड शिवापुर टोलनाक्यावर कोल्हापूरच्या दिशेने भरधाव वेगात जात असलेल्या एका इनोव्हा गाडीतून मोठी रोकड पकडण्यात पोलिसांना नाकाबंदी दरम्यान यश आले आहे. जवळपास पाच कोटी रुपयांची रोकड पकडण्यात आली आहे. याप्रकरणी तीन जणांना पोलिसांनी चौकशीसाठी ताब्यात घेतले आहे.
खेड शिवापूर टोलनाका परिसरात पुणे ग्रामीण पोलिसांनी चेक पोस्ट दरम्यान विविध वाहनांची तपासणी सोमवारी सुरू केली. यावेळी एमएच ४५ एएस 2526 या क्रमांकाची एक इनोवा क्रिस्टा पांढऱ्या रंगाची गाडी सदर ठिकाणी आली. सदर गाडीतील वाहन चालकाकडे कागदपत्रांची मागणी करून गाडी तपासणी केली असता, गाडीत मोठ्या प्रमाणात पैसे मिळून आले. त्यामुळे पोलिसांनी सदर वाहन खेड शिवापूर पोलीस ठाण्यात नेले. संबंधित गाडी ही सांगोला येथील एका नलावडे नावाच्या व्यक्तीवर असल्याची माहिती मिळाली आहे. सदर रक्कम नेमकी किती आहे हे समजण्यासाठी याबाबत पोलिसांनी नोटा मोजण्यास सुरुवात केली आहे. याबाबतची माहिती निवडणूक अधिकाऱ्यांना आणि आयकर विभागास देखील देण्यात आली आहे.नेमके हे पैसे कशाचे आहे, कुठे चालले याची चौकशी सुरू करण्यात आली आहे.
पुणे ग्रामीण पोलिस अधीक्षक पंकज देशमुख यांनी सांगितले की ,खेड शिवापूर टोल नाक्यावर पुणे ग्रामीण पोलिसांना एक संशयित इनोव्हा कार पोलिसांना मिळून आली आहे. सदर गाडीमध्ये पोलिसांना पैसे मिळाले असून त्याबाबतची मोजणी करण्यात येत आहे .सांगोला येथील नलावडे नावाच्या व्यक्तीवर संबंधित गाडी असल्याचे दिसून आले आहे याबाबत पुढील तपास करण्यात येत आहे.
