सांगली दिनांक १३ऑक्टोबर २०२४
मुंबईच्या टीएसटी संघाचे खेळाडू ध्रुव शहा व अनन्या चांदे यांनी अष्टपैलू खेळाचा प्रत्यय घडविला आणि पाचव्या राज्य मानांकन टेबल टेनिस स्पर्धेतील अनुक्रमे १९ वर्षाखालील मुले व मुलींच्या गटात विजेतेपद पटकाविले.
नवकृष्णा व्हॅली स्कूल, कुपवाड एमआयडीसी, सांगली येथे सूरज फाउंडेशन सांगली यांच्यातर्फे आणि महाराष्ट्र राज्य टेबल टेनिस संघटनेच्या मान्यतेने ही स्पर्धा आयोजित करण्यात आली आहे.
मुलांच्या १९ वर्षाखालील गटात तृतीय मानांकित खेळाडू ध्रुव याने मुंबई महानगर जिल्हा संघाचा आठवा मानांकित खेळाडू पार्थ मगर याची अनपेक्षित विजयाची मालिका खंडित केली. त्याने अटीतटीच्या लढतीनंतर ११-७,११-३,११-१३,११-१३, ११-४,११-९ असा विजय मिळविला. या सामन्यात दोन्ही खेळाडूंनी अतिशय बहारदार खेळ करीत प्रेक्षकांना खेळाचा आनंद मिळवून दिला. उपांत्य फेरीत ध्रुव याने पुण्याचा द्वितीय मानांकित खेळाडू नील मुळ्ये याच्यावर ११-८,११-९,११-९ असा सहज विजय मिळविला होता तर पार्थ याने आपला सहकारी सिद्धांत देशपांडे या चौथ्या मानांकित खेळाडूवर ११-३,१२-१४,११-४,११-८ अशी अनपेक्षित मात केली होती.
मुलींच्या अंतिम सामन्यात अनन्या हिने आपलीच सहकारी श्रावणी लोके या तृतीय मानांकित खेळाडूवर मात करीत आपले अग्रमानांकन साथ ठरविले. हा सामना तिने ११-२,११-५,११-७,११-९ असा जिंकताना काउंटर अटॅक पद्धतीचा सुरेख खेळ केला. उपांत्य फेरीत तिने ठाण्याची पाचवी मानांकित खेळाडू रितिका माथूर हिचे आव्हान ११-८,११-८,१२-१० असे संपुष्टात आणले होते तर श्रावणी हिने ठाण्याची खेळाडू ऋतुजा चिंचासुरे या दहाव्या मानांकित खेळाडूला ७-११, १३-११,११-८, ११-७ असे पराभूत केले होते.