मुंबई:
राष्ट्रवादी अजित पवार गटाचे नेते आणि राज्याचे माजी मंत्री बाबा सिद्दिकी यांच्यावर गोळीबार झाला असून त्यामध्ये त्यांचा मृत्यू झाला आहे. आमदार झिशान सिद्दिकी यांच्या कार्यालयासमोरच, बांद्रा पूर्वेत खेरवाडी परिसरात ही घटना घडली आहे.
मिळालेल्या माहितीनुसार, वांद्रे पूर्व येथील बाबा सिद्दीकी यांच्या कार्यालयाजवळील राम मंदिराजवळ गोळीबार झाल्याची माहिती समोर येत आहे. रात्री 9.15 च्या सुमारास ही घटना घडली. निर्मल नगर भागात फटाके वाजत असताना बाबा सिद्दीकी यांच्यावर गोळीबार झाला. यातील एक गोळी ही बाबा सिद्दीकी यांच्या छातीला लागली. बाबा सिद्दीकी यांचा मुलगा पुत्र झिशान सिद्दीकी यांच्या कार्यालयाजवळच हा गोळीबाराचा प्रकार घडला. १५ दिवसांपूर्वी त्यांना धमकी देण्यात आल्याची माहिती समोर आली आहे.
तीन अज्ञात व्यक्तींकडून हा गोळीबार झाला होता. पोलिसांकडून दोन संशयितांना अटक करण्यात आली आहे. हा गोळीबार पूर्वनियोजित प्लॅन असल्याचा संशय पोलिसांनी व्यक्त केला असून परिसरातील सीसीटिव्हीच्या आधारे पोलिसांकडून याप्रकरणी अधिक तपास सुरू आहे
बाबा सिद्दीकी यांनी जवळपास 48 वर्ष काँग्रेस पक्षात काम केलं. इतकच नव्हे तर ते सलग तीन वेळा वांद्रे पूर्व या मतदारसंघातून आमदार म्हणून निवडून आलेत. इतकच नव्हे तर बाबा सिद्दीकी यांच्या इफ्तार पार्टीचीही बरीच चर्चा असते. बॉलिवुडमधले मोठ मोठे सेलिब्रेटी हे बाबा सिद्दीकी यांच्या इफ्तार पार्टीला हजेरी लावतात.
बाबा सिद्दीकी यांनी अन्न व नागरी पुरवठा, कामगार राज्यमंत्री म्हणुन खातीदेखील सांभाळली आहेत.
बाबा सिद्दिकी हे 1992 आणि 1997 च्या मुंबई महापालिका निवडणुकीत नगरसेवक म्हणून विजयी झाले होते. 2000-2004 या कालावधीत काम करण्यासाठी महाराष्ट्र सरकारने म्हाडा मुंबई बोर्डाचे अध्यक्ष म्हणून सिद्दिकी यांची नियुक्तीही केली होती. बाबा सिद्दीकी हे मुंबई काँग्रेस आणि महाराष्ट्र प्रदेश काँग्रेसच्या समितीवर महत्त्वाच्या पदावर होते. 2014 च्या विधानसभा निवडणुकीत बाबा सिद्दीकी यांचा अशिष शेलार यांनी पराभव केला होता.
लोकसभेच्या निवडणुकीच्या आधी बाबा सिद्दिकी यांनी अजित पवारांच्या राष्ट्रवादीत प्रवेश केला होता. त्यांचे पुत्र झिशान सिद्दिकी हे वांद्रे पूर्वमधून आमदार आहेत.