पुणे-आचारसंहिता लागण्याच्या शक्यतेने मोठ्या प्रमाणात विकासकामांच्या कामांच्या निविदांना प्रशासकीय मान्यता देण्यासाठी सार्वजनिक बांधकाम विभागात हालचालींना वेग आला आहे. पुणे जिल्ह्यातील रस्त्यांसह इमारतीच्या विकासकामांसाठी सुमारे दोन ते अडीच हजार कोटींच्या कामांना बांधकाम विभागाने मंजुरी दिली आहे.
मान्यता मिळालेला निधी
■ रस्त्यांच्या १६७ कामांसाठी १२५२ कोटी
■ प्रत्यक्ष ११९ कामांचे ४९७ कोटी रुपयांचे कार्यादेश
■ शहर, जिल्ह्यातील इमारतींसाठी ९६१ कोटी ४९ लाख रुपये
■ ५९ पैकी केवळ १९ कामांसाठी ३१७ कोटी नऊ लाख रुपयांचे कार्यादेश
आगामी विधानसभा निवडणुकीच्या पार्श्वभूमीवर, येत्या काही दिवसांत आचारसंहिता लागण्याची शक्यता आहे. त्यामुळे सार्वजनिक बांधकाम, जलसंपदा, जिल्हा परिषदेच्या ग्रामपंचायत, बांधकाम विभागासह जिल्हाधिकारी कार्यालयातील जिल्हा नियोजन कार्यालयात प्रस्तावांना प्रशासकीय मान्यता देणे, निविदा काढणे, कार्यादेश (वर्कऑर्डर) देण्यासाठी घाई सुरू आहे. या सर्व विभागात ठेकेदारांची गर्दी वाढली आहे. बांधकाम विभागात पुणे शहरासह जिल्ह्यातील विविध विकास कामांच्या निविदा काढण्यात आल्या आहेत. त्यामध्ये पाईपलाइन, बसस्थानक थांबा, जिमचे साहित्य, सार्वजनिक ठिकाणी पेव्हिंग ब्लॉक बसविणे याशिवाय अन्य विकास कामांच्या निविदा सार्वजनिक बांधकाम विभागाच्या पूर्व, पश्चिम, दक्षिण आणि उत्तर विभागांकडून प्रसिद्ध करण्यात आल्या आहेत.
सार्वजनिक बांधकाम विभागाने जिल्ह्यातील रस्ते, इमारतींच्या कामांसाठी सुमारे अडीच हजार कोटीच्या खर्चाला मान्यता दिली आहे. त्यामध्ये रस्त्यांच्या १६७ कामांच्या १२५२ कोटींच्या खर्चाला मान्यता दिली आहे. त्यापैकी ४९७ कोटींच्या ११९ कामांचे कार्यादेश दिले आहेत. तर ७५५ कोटींच्या ४८ कामांचे कार्यादेश अद्याप देण्यात आले नाहीत.
शहर आणि जिल्ह्यातील इमारतींची ५९ कामे मंजूर करण्यात आली आहेत. त्यासाठी ९६१ कोटी ४९ लाखांच्या खर्चाला मान्यता दिली आहे. ५९ पैकी केवळ १९ कामांच्या ३१७ कोटी नऊ लाख रुपयांचे कार्यदिश विभागाने दिले आहेत. मात्र, एकूण मान्यतेच्या तुलनेत प्रत्यक्षात २५५ कोटींचीच तरतूद राज्य सरकारने केली आहे. त्यामुळे ४० कामांच्या ६४४ कोटींच्या कामांना अद्याप कार्यादेश देण्यात आले नाहीत. एकूण रस्ते आणि इमारतीच्या २२१३ कोटी ४९ लाखांच्या खर्चासाठी केवळ ३३१ कोटींची अर्थात सुमारे १५ टक्क्यांची अत्यल्प तरतूद करण्यात आली आहे,’ अशी माहिती येथे समजली आहे.
