मुंबई-मुंबईतील दादर भागात असणाऱ्या छत्रपती शिवाजी पार्कावर बुधवारी सकाळी खळबळजनक प्रकार घडला. एका चित्रपट निर्मात्याने थेट झाडावर चढत गळफास घेण्याची धमकी दिली. यामुळे अग्निशमन दलाला पाचारण करण्यात आले. त्यामुळे येथे पुरता गोंधळ उडाला होता.मिळालेल्या माहितीनुसार, अॅनिमल वेलफेअर बोर्ड ऑफ इंडियाकडून (एडब्ल्यूबीआय) सुरू असलेल्या जाचक वसुलीच्या विरोधात चित्रपट निर्माते प्रविणकुमार मोहरे यांनी हे आंदोलन केले आहे. सकाळच्या सुमारास ते झाडावर चढले आमि आपली सुटका करण्यासाठी कोणी प्रयत्न केल्यास गळफास घेऊ अशी धमकी दिली. याची माहिती मिळताच पोलिस अग्निशमन दल आणि प्रशासनाच्या अधिकाऱ्यांनी घटनास्थळ गाठत त्यांची समजूत काढण्याचा प्रयत्न केला.
चित्रपटात प्राण्यांचा वापर करायचा असल्यास AWBI ला 30 हजार रुपये द्यावे लागतात. त्यानंतर आम्हाला AWBI कडून ना-हरकत प्रमाणपत्र मिळते. जर, आम्ही हे शुल्क भरले नाही तर ते दृष्य चित्रपटातून वगळावे लागते. याचा अर्थ 30हजार रुपये भरले तर शूटिंग दरम्यान प्राण्यांसोबत होणारा कथित अन्याय थांबणार का असा प्रश्न प्रविणकुमार यांनी विचारला आहे.
प्रविणकुमार मोहरे पुढे म्हणाले की, आमचा चित्रपट रिलीजच्या वाटेवर आहे. चित्रपटात पाळीव प्राण्यावर दृष्ये चित्रीत करण्यात आले आहे. मात्र, सेन्सॉर बोर्डाकडून प्रमाणपत्र मिळत नसल्याने आता हा चित्रपट रिलीज कसा करायचा असा सवाल आमच्या समोर आहे. जनावरांच्या बेकायदेशीपणे कत्तली रोखण्याऐवजी AWBI कडून प्राण्यांवरील कथित छळ रोखण्याऐवजी निर्मात्यांकडून पैसे वसूल केले जात असल्याचा आरोप केला आहे.
