पुणे-शिवाजीनगर येथील एका वसतीगृहात लिफ्ट मधून जात असताना, अचानक लिफ्ट बंद पडली. त्यामुळे बंद पडलेल्या लिफ्टमधून मोकळ्या जागेत उडी मारताना पडल्याने गंभीर जखमी झालेल्या महाविद्यालयीन तरुणाचा दुर्देवीरित्या मृत्यू झाला. या दुर्घटनेस जबाबदार ठरल्याप्रकरणी वसतिगृहाच्या विश्वस्तांसह रखवालदाराविरुद्ध सदोष मनुष्यवधाचा गुन्हा पाेलीसांकडून दाखल करण्यात आला अाहे.
अजय अशोक मिरांडे (वय -१९, मूळ रा. वैष्णवी बंगला, सावेडी, अहमदनगर) असे या घटनेत मयत झालेल्या तरुणाचे नाव आहे. याप्रकरणी जे. पी. त्रिवेदी मेमोरिअल ट्रस्टचे विश्वस्त, वसतिगृहाचे पर्यवेक्षक अंजना केतन मोतीवाला, रखवालदार सुभाष सुर्वे यांच्याविरुद्ध सदोष मनुष्यवध भादंवि ३०४ अ, ३४ या कलमांनुसार शिवाजीनगर पाेलीस ठाण्यात गुन्हा दाखल करण्यात आला आहे. याबाबत मयत अजयचे वडील अशोक मदनलाल मिरांडे (वय ५५) यांनी पोलीस ठाण्यात अाराेपी विराेधात फिर्याद दिली आहे. अजय मिरांडे हा विद्यार्थी शासकीय अभियांत्रिकी महाविद्यालयात शिक्षण घेत होता तसेच शिवाजीनगर परिसरातील घोले रस्त्यावर जे. पी. त्रिवेदी मेमोरिअल ट्रस्टचे वसतिगृहात राहत हाेता. १५ मार्च रोजी रात्री सव्वआठच्या सुमारास अजय आणि त्याचे मित्र लिफ्टमधून जात होते. त्यावेळी अचानक तांत्रिक कारणाने लिफ्ट बंद पडली. त्यावेळी रखवालदार सुर्वे याने लिफ्ट बंद पडल्यानंतर विद्यार्थ्यांना योग्यप्रकारे मार्गदर्शन केले नाही. अजयला लिफ्टच्या डक्टमध्ये उडी मारण्यास त्यांनी सांगितले. अजयने उडी मारल्याने तो ताेल जाऊन पडून गंभीर जखमी झाला. त्याच्या डाेक्याला व हात पायास मार लागल्याने जखम झाली. त्यानंतर उपचारादरम्यान त्याचा मृत्यू झाला अाहे.
या घटनेनंतर शिवाजीनगर पोलिसांनी घटनास्थळी जाऊन लिफ्ट परिसराची पाहणी केली. लिफ्टमधील मुलांना बाहेर काढण्यासाठी पर्यवेक्षक मोतीवाला यांनी योग्य त्या सूचना दिल्या नव्हत्या. त्यांना याबाबतचे मार्गदर्शन वसतिगृहातील रखवालदारला दिले नसल्याचे चाैकशीत समाेर आले. त्यानंतर मोतीवाला यांच्यासह रखवालदार सुर्वे, तसेच विश्वस्तांविरुद्ध निष्काळजीपणा केल्याचा गुन्हा दाखल करण्यात आला. पोलीस उपनिरीक्षक एस बडे पुढील तपास करत आहेत.
