पुणे- पुणे शहराचा लौकिक बिघडू देऊ नका , अपघातग्रस्त पुणे अशी नवी ओळख निर्माण होऊ देऊ नका , वाहतूक पोलिसांनी याबाबत दक्षता घेतली पाहिजे आणि प्रामाणिकपणे काम केले पाहिजे,पुणे वाहतुकीसाठी सुलभ आणि सुरक्षित व्हावे यासाठी आपण मुख्यमंत्री, उपमुख्यमंत्री आणि हवे तर राज्यसभेतही आवाज उठवू असे खासदार मेधा कुलकर्णी यांनी म्हटले
खासदार कुलकर्णी यांनी काल चांदणी चौकात झालेल्या अपघाताच्या ठिकाणी तातडीने अपघात स्थळी जाऊन भेट दिली. पोलीस अधिकारी, एसटी महामंडळाचे अधिकारी, नागरिक यांच्याशी चर्चा केली.चांदणी चौकाच्या कोथरूडकडे येणाऱ्या उतारावर एक मालवाहतूक एसटी महाकार्गो ही मिक्सरला धडकली आणि त्याच्यानंतर तिने दुचाकीला उडवले आणि तीन जण गंभीर झाले.त्या म्हणाल्या,’पुण्यामध्ये इतक्या मोठ्या प्रमाणात अपघात होत आहेत. रोज दोन तीन ठिकाणी अतिशय गंभीर असे अपघात होतात. या संदर्भामध्ये मी देवेंद्रजी यांनाही पत्र लिहिलं आहे आणि १४ तारखेला मुंबईला ते देवेंद्रजींना देणार आहे. महानगरपालिका आणि पोलीस खातं यांची एक संयुक्त बैठक घेऊन कायमस्वरूपी काहीतरी इलाज करायला पाहिजे आणि हा प्रत्येक प्रत्येक ठिकाणी उपाययोजना करायला हव्यात. चौकाच्या रचनेतील दोष सुधारणे, सीसीटीव्ही कॅमेरे बसवणे, रस्ते वाहतुकीसाठी अतिक्रमण मुक्त करणे, वाहनांना जड वाहनांना बंदी च्या नियमाचे काटेकोर पालन, वाहतुकीचे नियमांचे पालन आणि त्यावर पोलिसांचे नियंत्रण या सगळ्या गोष्टींची मागणी मी केली आहे.आगामी काळात महानगरपालिका आणि पोलीस प्रशासन यांची एकत्रित बैठक घेऊन पुणे वाहतुकीसाठी सुलभ आणि सुरक्षित व्हावे यासाठी प्रयत्न करणार आहे.