पुणे-रामटेकडी भागातील पेट्रोलपंपावर दरोडा टाकण्याच्या तयारीत असणाऱ्या चार चोरट्यांना वानवडी पोलिसांनी अटक केली आहे. तर घातक शस्त्रे जप्त करण्यात आली आली. आदित्य उर्फ गोऱ्या महेंद्र शिंदे (वय २१, रा. आदिनाथ सोसायटी, रामटेकडी, हडपसर), साहिल खंडू पेठे (वय-२१), नोवेल जॉन वाल्हेकर (वय-१९), सुहाना मुजावर खान (वय-१९, तिघेही रा. तरवडे वस्ती, हडपसर) असे अटक करण्यात आलेल्या आरोपीचे नाव आहे. तसेच त्यांच्या दोन साथीदारांवर गुन्हा दाखल करण्यात आला आहे. याप्रकरणी पोलीस अंमलदार संदीप साळवे (वय-३६) यांनी वानवडी पोलीस ठाण्यात फिर्याद दिली आहे.
पोलिसांनी दिलेल्या माहिती नुसार, आरोपी आदित्य शिंदे आणि त्याच्या सहकारी हे बुधानी वेफर्स कंपनीच्या बाजूला असलेल्या बाजूच्या जागेत लोखंडी हत्यार दोरी, स्क्रू ड्रायव्हर आदी घातक शस्त्रे घेऊन थांबले होते. रामटेकडी परिसरात असणाऱ्या एचपी पेट्रोल पंपावरील दरोडा टाकून रोकड लुटण्याच्या तयारीत असल्याची माहिती वानवडी पोलिसांना मिळाली होती. पोलिसांच्या पथकाने आरोपींना सापळा लावून ताब्यात घेतले. त्यांच्याबरोबर असलेले दोन साथीदार पसार झाले असून, त्यांचा शोध घेण्यात येत आहेत. चोरट्यांकडून दोन दुचाकीसह ८० हजार ८०० रुपयांचा मुद्देमाल जप्त करण्यात आला आहे. पोलीस निरीक्षक (गुन्हे) राजेंद्र करणकोट तपास करत आहेत.