पुणे- पुणे शहरामध्ये वाहनांच्या तोडफोडीच्या घटना वारंवार घडत आहेत. वाहनांची तोडफोड करणारे आरोपी हे अल्पवयीन असल्याचे दिसून येत आहे. त्यामुळे पुणे पोलिसांनी वाहनांची तोडफोड करणाऱ्या अल्पवयीन मुलांच्या पालकांवर गुन्हा दाखल करण्याचा निर्णय घेतला आहे. त्यानुसार पर्वती पोलीस ठाण्याच्या हद्दीत वाहनांची तोडफोड करणाऱ्या 9 अल्पवयीन मुलांच्या पालकांवर गुन्हा दाखल करुन अल्पवयीन मुलांना हत्यारे पुरवणाऱ्या लोहाराला अटक करण्यात आली आहे.दांडेकर पुल नव महाराष्ट्र भागात तीन दुचाकांवरुन येऊन काही मोटार सायकलची तोडफोड केल्याची घटना सोमवारी (दि.18) घडली होती. याप्रकरणी पर्वती पोलीस ठाण्यात आयपीसी 427, 34, 143, 147, 148, 149 सह मोटार वाहतूक कायदा, आर्म अॅक्ट, महाराष्ट्र पोलीस काद्यांतर्गत गुन्हा दाखल केला होता. दाखल गुन्ह्याचा तपास करत असताना हा गुन्हा 9 अल्पवयीन मुलांनी केल्याचे निष्पन्न झाले.दाखल गुन्ह्यात पोलिसांनी अल्पवयीन मुलांना हत्यारे देणारा लोहार भावेश दिपक चव्हाण (वय-21 रा. रविवार पेठ, पुणे) याला देखील अटक केली आहे. तसेच अल्पवयीन मुलांकडे दुचाकी वापरण्याचा परवाना नसताना त्यांना गाडी वापरण्यासाठी दिल्यामुळे त्यांच्या पालकांना सह आरोपी करुन गुन्हा दाखल करून त्यांच्यावर कायदेशीर कारवाई केली आहे. पोलिसांनी अल्पवयीन मुलांनी गुन्ह्यात वापरलेल्या दुचाकी जप्त केल्या आहेत.तोडफोडीच्या गुन्ह्यामध्ये अल्पवयीन बालकांचा सहभाग आढळुन आल्यास त्यांच्यावर व त्यांना गुन्ह्यासाठी मदतकरणाऱ्यांवर तसेच मुलांच्या पालकांवर कायदेशीर कडक कारवाई केली जाईल असा इशारा वरिष्ठ पोलीस निरीक्षक नंदकुमार गायकवाड यांनी दिला आहे.
ही कामगिरी अपर पोलीस आयुक्त पश्चिम प्रादेशिक विभाग प्रविण पाटील पोलीस उपायुक्त परिमंडळ 3 संभाजी कदम, वरिष्ठ पोलीस निरीक्षक नंदकुमार गायकवाड यांच्या मार्गदर्शनाखाली तपास पथकाचे पोलीस उपनिरीक्षक सचिन पवार , पोलीस अंमलदार कुंदन शिंदे, प्रकाश मरगजे, अनिस तांबोळी, सुर्या जाधव, दयानंद तेलंगे-पाटील, सद्दाम शेख, अमोल दबडे, अमित चिव्हे, पुरुषोत्तम गुन्ला, अक्षय खन्ना यांच्या पथकाने केली.
