मुंबई-बहुजनवादी विचारधारेसाठी आक्रमक भूमिका घेऊन महाराष्ट्राच्या सांस्कृतिक आणि सामाजिक क्षेत्रात योगदान देणाऱ्या संभाजी ब्रिगेडच्या मुंबई अध्यक्ष यांच्यासह राज्यभरातील शेकडो पदाधिकारी आणि कार्यकर्त्यांनी आज ना. अजितदादा पवार यांना समर्थन देत देवगिरी या निवासस्थानी राष्ट्रवादी काँग्रेस पक्षात जाहीर प्रवेश केला. अजितदादांच्या नेतृत्वात निस्वार्थपणे काम करण्याची इच्छा यावेळी सर्व पदाधिकाऱ्यांनी व्यक्त केली. आमदार अमोल मिटकरी यांच्या पुढाकारातून हा पक्षप्रवेश सोहळा पार पडला.
संभाजी ब्रिगेड संघटनेत काम करणाऱ्या पदाधिकाऱ्यांनी राष्ट्रवादी काँग्रेस पक्षात सहभागी होण्याचा निर्णय घेतला याबद्दल सर्वांचे आभार मानत अजितदादांनी सर्वांचे पक्षात स्वागत केलं. संभाजी ब्रिगेड संघटनेची ओळख विचारांसाठी आक्रमक भूमिका घेणारी संघटना अशी आहे. हा आक्रमकपणा योग्य ठिकाणी वापरून त्यातून जनहिताची कामं आपल्याला करायची असल्याचं अजितदादांनी यावेळी सांगितलं.
राष्ट्रवादी काँग्रेस पार्टी ही आज महायुती सोबत सत्तेत सहभागी असली तरी शिव-फुले-शाहू-आंबेडकरांची बहुजनवादी विचारधारा पुढे घेऊन जात असल्याचं यावेळी ना. अजितदादा म्हणाले. आगामी निवडणुकांमध्ये महायुतीच्या जास्तीत जास्त जागा निवडून आणण्याचे एकत्रित काम करायचं आहे. यासाठी एकमेकांना निश्चितच मदत करू असा विश्वास त्यांनी व्यक्त केला.
या पक्षप्रवेश सोहळ्याला क्रीडा व युवक कल्याण मंत्री ना. संजय बनसोडे, प्रदेश उपाध्यक्ष प्रमोद हिंदुराव तसेच संभाजी ब्रिगेड संघटनेचे मान्यवर मंडळी उपस्थित होती.
